खरी कुजबूज: केव्हा काय होणार हे आपण सांगू शकत नाही. अफगाणिस्तानात (Afghanistan) एका झटक्यात होत्याचे नव्हते झाले. तेथे तालिबानी (Taliban) दहशतवाद्यांनी जो नरसंहार चालविला आहे, तो पाहिल्यास कोणाच्याही हृदयात धडकी भरू शकते. असे असताना कुंकळ्ळीचे माजी नगरसेवक शशांक देसाई यांनी कुंकळ्ळीत तालिबानी आल्याची पोस्ट समाज माध्यमावर टाकून सगळ्याचीच भंबेरी उडवली.

मात्र, नंतर पोस्ट वाचल्यावर समजले की, हे तालिबानी गंधार देशी कंदहारातून आलेले नसून ते तालिबानी वरकनगरीतून आले असून नाहक खोटे व्हिडिओ तयार करून काहीजण नागरिकांमध्ये भीती निर्माण करतात असा शशांक यांचा दावा आहे. एक मात्र खरे, गेल्या निवडणुकीत शशांकही त्याच गोटात होता, म्हणजे शशांकबाब तुम्हीही तसेच झालात की हो!