Sanjay School Porvorim पर्वरी येथील संजय स्कूलच्या जुन्या इमारतीच्या दुसऱ्या मजल्यावरून पडून जखमी झालेल्या सिडनी डिसोझा (वय 40 वर्षे) या दिव्यांगावर गोमेकॉत उपचार सुरू आहेत. मात्र, अद्याप त्याच्या प्रकृतीत सुधारणा झालेली नाही. त्याची प्रकृती चिंताजनक आहे.

तो जबानी देण्याच्या स्थितीत नसल्याने डॉक्टरांनी पोलिसांना या घटनेची जबानी नोंद करण्यास परवानगी दिली नाही, अशी माहिती पर्वरीचे पोलिस निरीक्षक अनंत गावकर यांनी दिली.

याप्रकरणी पोलिसांनी अपघाताचा गुन्हा नोंद केला आहे. संजय स्कूलची इमारत जुनी असून ती सरकारी मालकीची आहे. दिव्यांग सिडनी हा पडून जखमी झाल्याने याप्रकरणी संजय स्कूलचे व्यवस्थापन जबाबदार आहे का, तसेच ही इमारत धोकादायक म्हणून घोषित केली आहे का, याचीही चौकशी करण्यात येत आहे.

याप्रकरणी दिव्यांगासोबत आलेल्या त्याच्या आईची जबानीही नोंदवली आहे. त्याच्या कंबरेच्या मणक्यात फ्रॅक्चर झाले आहे, तसेच डोक्याला गंभीर दुखापत झाली आहे. त्यामुळे तो धोक्यातून बाहेर आलेला नाही, असे मत डॉक्टरांनी व्यक्त केले आहे.

मुख्यमंत्र्यांकडून कानाडोळा; संताप व्यक्त

दिव्यांगांसाठी असलेल्या जुन्या संजय स्कूल इमारतीच्या दुसऱ्या मजल्यावरून पडून झालेल्या या दुर्घटनेची माहिती मुख्यमंत्री डॉ. प्रमोद सावंत यांना देण्यात आली होती.

दिव्यांगांच्या पालकांना मुख्यमंत्र्यांकडून या प्रकरणात हस्तक्षेप होऊन त्यावर ते काही तरी सूचना करतील, अशी अपेक्षा होती. मात्र मुख्यमंत्र्यांनी यावर काहीच प्रतिक्रिया व्यक्त न केल्यामुळे लोकांनी संताप व्यक्त केला आहे.