Goa Politics: निवडणुकीचे पाणी नाकापर्यंत येऊनही काँग्रेसकडून (GPCC) अजून युतीबद्दल स्पष्टता येत नसल्याने राष्ट्रवादीचे आमदार चर्चिल आलेमाव (NCP Leader Churchill Alemao) यांनी या महिन्या अखेरपर्यंत मुदत दिली आहे. 31 ऑक्टोबर पर्यंत काँग्रेसने आपली भूमिका स्पष्ट करावी अन्यथा आम्ही स्वबळावर निवडणूक (Goa Election 2022) लढवू असा इशारा आज त्यांनी दिला.

दोन दिवसांपूर्वी चर्चिल आलेमाव यांनी राष्ट्रवादीचे अध्यक्ष शरद पवार आणि सरचिटणीस प्रफुल्ल पटेल यांची भेट घेतली होती. या भेटीत आपण पक्षाच्या दोन्ही नेत्यांना माझ्या पुढील कृतीची कल्पना दिली आहे. त्यांनी हा महिना अखेरपर्यंत वाट पाहावी असा सल्ला आपल्याला दिला आहे असे सांगितले.

मी राष्ट्रवादी पक्ष सोडणार नाही. पण काँग्रेसचे वेळकाढू धोरण मला पसंत नाही. युती झाल्यास 10 जागा राष्ट्रवादीला सोडाव्यात अशी आमची काँग्रेसकडे मागणी आहे. युती न झाल्यास किमान 26 ठिकाणी आम्ही उमेदवार उभे करू. आमचे उमेदवार तयार आहेत असे त्यांनी शुक्रवारी आपल्या वार्कां येथे घेतलेल्या पत्रकार परिषदेत सांगितले.

आपली कन्या वालांका आलेमाव नावेली मतदारसंघातून निवडणूक लढविणारच असे स्पष्ट करताना राष्ट्रवादीने उमेदवारी दिली नाही तर ती अपक्ष म्हणून निवडणूक लढविणार. वालांका अजून काँग्रेस पक्षातच आहे असे सांगत नावेलीत काँग्रेसचे आमदार लुईझींन फालेरो यांनी आमदारकीचा राजीनामा दिल्याने आता हा मतदारसंघ खुला झाला आहे असे त्यांनी सांगितले.

नावेलीत अजूनही आपल्याजडे मते आहेत 2017 च्या निवडणुकीत लुईझींन फालेरो याना मीच नावेलीत निवडून आणले होते, असाही दावा त्यांनी केला.