Goa Assembly Winter Session 2025

मडगाव: कुठलीही आणीबाणीची परिस्थिती उद्‍भवलेली नसताना या सरकारने फक्त दोन दिवसांचेच अधिवेशन का बोलावले, याचे स्पष्टीकरण सरकारने द्यावे, अन्यथा आम्हा विरोधकांवर पणजीच्या आझाद मैदानावर लोकांचे अधिवेशन घेण्याची पाळी येईल, असा इशारा गोवा फॉरवर्डचे अध्यक्ष विजय सरदेसाई यांनी दिला आहे.

शुक्रवारी (3 जानेवारी) एक व्हिडिओ प्रसारित करून त्यांनी मुख्यमंत्र्यांकडून स्पष्टीकरण मागितले आहे. यापूर्वी पर्रीकर आजारी असताना आणि नंतर कोविडची साथ असताना असे छोटे अधिवेशन घेतले आहे. पण आता तशी कोणतीही परिस्थिती नसताना हे असे दोन दिवसांचे विधानसभा अधिवेशन काय? असा सवाल करून प्रमोद सावंत यांना चीनमधून एखादा नवीन व्हायरस येणारं याची माहिती मिळाली, की त्यांना बदलून गोव्यात (Goa) नवीन मुख्यमंत्री आणला जाणार, ज्याची तयारी झालेली नसल्याने हे अधिवेशन दोन दिवसांवर आणले आहे का? असा सवाल त्यांनी केला.

हा निर्णय आपला नव्हे, तर मंत्रिमंडळाचा असा खुलासा सभापती रमेश तवडकर (Ramesh Tawadkar) यांनी केला आहे. याचा उल्लेख करत, या सरकारच्या पातळीवर दररोज नवीन घोटाळा उघडकीस येतो. त्यात कॅश फॉर जॉब घोटाळा आणि जमीन हडप घोटाळा, अशा अनेक प्रकरणाचा सामावेश आहे. या अशा प्रकरणांवर चर्चा होऊ नये, असे वाटल्यानेच विधानसभा अधिवेशन दोन दिवसांवर आणले का? असा सवाल त्यांनी केला आहे.