पणजी: भारतीय जनता पक्ष आणि महाराष्ट्रवादी गोमंतक पक्षात गेल्या काही दिवसांपासून धूसफूस सुरु आहे. सुरुवातीला मुख्यमंत्री डॉ. प्रमोद सावंत आणि त्यानंतर मंत्री गोविंद गावडे यांनी युतीवर केलेल्या वक्तव्यामुळे अस्वस्थ झालेल्या ढवळीकर बंधुंनी थेट दिल्ली गाठून भाजपचे संघटन प्रमुख बी. एल. संतोष यांची भेट घेतली. संतोष यांनी ढवळीकरांना युतीबाबत ठोस आश्वासन दिल्याची माहिती समोर येत आहे.

'प्रियोळ मतदारसंघ भाजपकडे राहणार, मान्य नसेल तर त्यांनी (मगो) निघावं', असं वक्तव्य मुख्यमंत्री प्रमोद सावंत यांनी काही दिवसांपूर्वी केले होते. यानंतर 'भाजपला मगोसोबत युतीची गरज नाही', असे वक्तव्य मंत्री गावडेंनी केल्याने युतीतील वाद चव्हाट्यावर आला होता. भाजप नेत्यांच्या वक्तव्यांवरुन अस्वस्थ झालेल्या ढवळीकर बंधुंनी थेट दिल्ली गाठून भाजपचे संघटन प्रमुख बी. एल. संतोष यांची भेट घेतली. २०२७ मध्ये देखील भाजप - मगोची युती राहणार, असे आश्वासन बी. एल. संतोष यांनी दिल्याची माहिती मगो अध्यक्ष दिपक ढवळीकरांनी दिली आहे.

मगोचा प्रियोळ मतदारसंघावर डोळा आहे अशी मुख्यमंत्री डॉ. प्रमोद सावंत यांची दिशाभूल करण्यात आल्याने त्यांनी युतीबाबत वक्तव्य केल्याचे मगोचे अध्यक्ष दिपक ढवळीकर म्हणाले. या वक्तव्यावर मुख्यमंत्री सावंत यांनी स्पष्टीकरण दिले आहे. २०२७ मध्ये देखील भाजप - मगो युती कायम राहणार आहे. मतदारसंघनिहाय सर्व्हेक्षण केल्यानंतर जागा वाटपाबाबत निर्णय घेतला जाईल, अशी चर्चा संतोष यांच्याशी झाल्याची माहिती अध्यक्ष दिपक ढवळीकरांनी दिली आहे.

युतीबाबत उलटसुलट चर्चा होऊ लागल्यानंतर मुख्यमंत्री प्रमोद सावंत यांनी युती राहणार नाही, असे कुठेच वक्तव्य केले नसल्याचे स्पष्टीकरण दिले. दरम्यान, मंत्री गावडे यांनी मात्र ढवळीकर बंधुंवर सडकून टीका करत त्यांनी गोव्यातील बहुजन लोकांना संपविण्याचा प्रयत्न केला असा आरोप केला. तसेच, दोघांना राजकारणात घेऊन येणे माझ्या आयुष्यातील सर्वात मोठी चूक असल्याचे गावडे म्हणाले. यामुळे भाजप - युतीतील वाद वाढल्याचे दिसून आले.

दुसरीकडे मांद्रेचे मगो आमदार जीत आरोलकर मात्र पक्षाचे अध्यक्षपद स्वीकारण्यासाठी उत्सुक असल्याचे त्यांनी म्हटले आहे. पक्षाच्या सदस्यपदाची साडेतीन वर्षे पूर्ण झाल्याने आपण अध्यक्षपद स्वीकारण्यासाठी पात्र असल्याचा दावा आरोलकरांनी केला. दरम्यान, पक्षाच्या घटनेनुसार पक्ष सदस्यत्व घेऊन सहा वर्षे पूर्ण झाल्याशिवाय अध्यक्षपदी नियुक्ती करता येत नाही, असा निर्वाळा विद्यमान अध्यक्ष दिपक ढवळीकरांनी दिला होता. गोविंद गावडेंनी हिम्मत असेल जीत आरोलकरांना अध्यक्ष करा, असे आव्हान ढवळीकरांना केले होते.