पणजी: कॅसिनो मॅजेस्‍टिकचे संचालक श्रीनिवास नायक यांच्‍यावर गोळीबार करणाऱ्या संशयितांच्‍या शोधासाठी गोवा पोलिसांनी एक पथक मुंबईला पाठविले आहे. ‘‘माझे कुणाशीही भांडण नव्‍हते. माझ्यावरील हल्ल्‍याबाबतची सर्व माहिती मी पोलिसांना दिली आहे’’, असे नायक यांनी रविवारी ‘गोमन्‍तक’शी बोलताना सांगितले.

शुक्रवारी रात्री ८.४५ च्‍या सुमारास पर्वरी येथील कॅसिनो मॅजेस्‍टिकमधून घरी जाण्‍यासाठी कारकडे निघालेल्‍या श्रीनिवास नायक यांच्‍यावर दोन अज्ञातांनी गोळीबार केला. त्‍यानंतर लगेच त्‍यांच्‍या सुरक्षा रक्षकानेही प्रत्‍युत्तरादाखल गोळीबार सुरू केल्‍यानंतर संशयितांनी तेथून पळ काढला.

पर्वरी महामार्गालगत तसेच विधानसभा, पर्वरी पोलिस स्‍थानकापासून अगदी जवळ असलेल्‍या कॅसिनो मॅजेस्‍टिकबाहेर अशा पद्धतीचा गोळीबार झाल्‍याने राजकीय वातावरण तापले आहे. याप्रश्‍नी गोळीबार करणाऱ्यांना अजिबात सोडणार नसल्‍याचा इशारा मुख्‍यमंत्री डॉ. प्रमोद सावंत यांनी दिला आहे.

‘‘नायक यांच्‍यावर गोळीबार सुपारी किलरनी केल्‍याचा संशय व्‍यक्त करून पोलिसांनी फरार झालेल्‍या अज्ञात संशयितांचा शोध घेण्‍यास सुरुवात केली आहे. संशयित मुंबईला पळाल्‍याचा संशय असल्‍याने पोलिसांचे एक पथक मुंबईला पाठवले आहे. गोळीबार करणाऱ्यांना लवकरात लवकर अटक केले जाईल’’, असे पर्वरी पोलिस स्‍थानकाचे निरीक्षक तुकाराम चव्‍हाण यांनी सांगितले.

दरम्‍यान, राज्‍य विधानसभेचे तीन दिवसीय अधिवेशन सोमवारपासून सुरू होत आहे. त्‍याआधीच राज्‍यात अशी गोळीबाराची घटना घडल्‍यामुळे राज्‍यातील कायदा आणि सुव्‍यवस्‍थेवरून सरकारला घेरण्‍याची तयारी विरोधी सातही आमदारांनी केली आहे. त्‍यामुळे या विषयावरून सरकार आणि विरोधकांत कामकाजाच्‍या सुरुवातीलाच पेटण्‍याची शक्‍यता आहे.