पणजी: ६० हून अधिक चित्रपटांची निर्मिती केलेले पश्चिम बंगालमधील चित्रपट निर्माते श्यामसुंदर डे यांना गोव्यात डांबून ठेवून लुटल्याप्रकरणी आता २ जुलैपासून पोलिस तपास सुरू होणार आहे. या प्रकरणी तक्रारीत नाव नोंद असलेले अभिनेत्री पूजा बॅनर्जी आणि तिचे पती अभिनेता कुणाल वर्मा यांना कळंगुट पोलिसांनी चौकशीसाठी बोलावले आहे.

खंडणी व अपहरणप्रकरणी त्या दोघांवर कळंगुट पोलिसांनी गुन्हा नोंदवला आहे. बंगाली चित्रपट निर्माते श्याम सुंदर डे यांनी आरोप केला आहे की, गोव्यातील त्यांच्या वास्तव्यात पूजा व कुणाल यांनी त्यांचे अपहरण करून त्यांना चार दिवस एका व्हिलामध्ये बंदी बनवून ठेवले.

या काळात त्यांच्याकडून धमकी देत २३ लाख रुपयांची खंडणी वसूल केली. या घटनेची पहिली तक्रार श्याम यांच्या पत्नी मालबिका यांनी १२ जून रोजी कोलकात्यातील पोलिस ठाण्यात दाखल केली होती.

घटना उत्तर गोव्यात घडल्याने हे प्रकरण कोलकाता पोलिसांनी कळंगुट पोलिसांकडे वर्ग केले. बिधाननगर पोलिस आयुक्तालयाकडून कळंगुट पोलिसांना झिरो एफआयआर प्राप्त झाल्यानंतर गुन्हा नोंदवला आहे.

दरम्यान, पूजा बॅनर्जी यांनी सोशल मीडियावर म्हटले आहे की,आम्ही कठीण काळातून जात आहोत. कुणाल वर्मा यांनी या प्रकरणी एकच बाजू समोर आलीय, असा दावा केला होता.

हायप्रोफाइल खंडणी प्रकरण

या खळबळजनक प्रकरणात अपहरण, जबरदस्तीने पैसे उकळणे, मारहाण आणि धमकी यांसह विविध गंभीर आरोप असून भारतीय न्याय संहितेतील अनेक कलमांखाली गुन्हा नोंदवला आहे. यामध्ये अपहरण, जबरदस्तीने कैद करणे, खंडणी, मारहाण आणि गुन्हेगारी धमकी यांचा समावेश आहे.

हे हायप्रोफाइल खंडणी प्रकरण आता अधिकच गडद होत चालले असून २ जुलैपासून सुरू होणाऱ्या तपासामध्ये अनेक धक्कादायक बाबी उघडकीस येण्याची शक्यता आहे.