Goa Drugs Case गोव्याचे मुख्यमंत्री प्रमोद सावंत यांना गोव्यातील हा ड्रग व्यवहार बंद करण्याची राजकीय इच्छाशक्ती नाही किंवा या बेकायदेशीर व्यवहारातून त्यांना फायदा होत असावा. सरकारी आशिर्वाद असल्याशिवाय असे धंदे गोव्यात चालू राहणे शक्यच नाही असा आरोप गोवा फॉरवर्डचे सरचिटणीस दुर्गादास कामत यांनी केला आहे.

मुंबई येथील केंद्रीय अमली पदार्थ विभाग पथकाने हरमल येथे धाड घालून मोठ्या प्रमाणावर चालणारे ड्रग रॅकेट उघडकीस आणले आहे.

या पार्श्वभूमीवर गोव्यातील पोलीसांच्या नाकासमोर चालू असलेले व्यवहार कसे बिनबोभाट चालू आहेत हे सिद्ध होते अशी टिका गोवा फॉरवर्डचे सरचिटणीस दुर्गादास कामत यांनी केली आहे.

या पूर्वी गोवा फॉरवर्डचे अध्यक्ष विजय सरदेसाई यांनी गोव्यात ड्रग्ज कार्टेल चालू असून गोवा पोलिस त्याच्यावर कसलीच कारवाई करत नाही असे म्हटले होते. त्यांचा हा आरोप खरा असल्याचे या आजच्या गोष्टीवरून सिद्ध झाले आहे असे कामत यांनी म्हटले आहे.

यापूर्वी हैद्राबाद पोलिसांनी गोव्यातील ड्रग्स डीलरना अटक केली होती. आता मुंबईच्या पोलीसांनी करवाई केली आहे. यावरून गोवा पोलिसांची अकार्यक्षमता पुन्हा एकदा स्पष्ट झाली.

एकतर गोव्यातील पोलीस या कारवाईच्या बाबतीत अकार्यक्षम आहेत किंवा ते जाणुन बुजून त्याकडे दुर्लक्ष करत आहेत हे सिद्ध झाले आहे असे कामत यांनी म्हटले आहे.