पणजी: गोवा पोलिसांच्या सायबर गुन्हे शाखेनं एका मोठ्या सायबर फसवणूक प्रकरणाचा छडा लावला आहे. तब्बल 2.63 कोटी रुपये फसवणूकीच्याया प्रकरणात अहमदाबाद येथून एका संशयित आरोपीला अटक केली आहे. आरोपीला सध्या पोलिस कोठडी सुनावण्यात आलीय.

थिवी, बार्देश येथील तक्रारदाराने सायबर गुन्हे शाखेकडे फसवणूक झाल्याची तक्रार केली होती. पोलिसांनी दिलेल्या माहितीनुसार, अलिझा नावाच्या थिवी येथील व्यक्तीशी फोनद्वारे संपर्क साधला आणि गुंतवणुकीबाबत माहिती दिली. तसंच जास्त परताव्याचे आमिष दाखवून गुंतवणुक करण्यास भाग पाडलं. त्या व्यक्तीनं बँक व्यवहारांच्या माध्यमातून तक्रारदाराकडून 2.63 कोटी रुपयांची रक्कम उकळली.

तक्रार दाखल होताच, पीआय दीपक पेडणेकर यांच्या मार्गदर्शनाखाली विशेष पथक तयार करण्यात आले. या पथकाने बँक व्यवहारांचा सखोल मागोवा घेत संशयित आरोपींचा शोध सुरू केला.

विविध बँक खात्यांमधून झालेल्या व्यवहारांच्या तपशिलांच्या आधारे पोलिसांनी संशयित रमेश कुमार यादव (वय ३९, रा. अहमदाबाद, गुजरात) याची ओळख पटवली. त्यानंतर पोलिसांनी सापळा रचून अहमदाबादून त्याला अटक केली. पोलिसांकडून या प्रकरणाचा सखोल तपास सुरू आहे.

मोठ्या परताव्याचं आमिष दाखवणाऱ्या अनोळखी व्यक्तींशी आर्थिक व्यवहार करताना अत्यंत सावधगिरी नागरीकांनी बाळगावी. अशा प्रकारच्या सायबर फसवणुकीपासून स्वतःला वाचवण्यासाठी सतर्क राहण्याचंही आवाहन करण्यात आलं आहे.