पणजी: सांताक्रुझ येथे बुधवारी रात्री गोवा पोलिसांनी तीन हिस्ट्रीशिटर व आणखी एका व्यक्तीला अटक केली. अँथनी नाडार (३१), करीम बेपारी (३५), फ्रान्सिस नडार (२८) व मिंगेल अराउजो (२४) अशी संशयितांची नावे असून, चौघेही सांताक्रुझचेच रहिवासी आहेत. उत्तर गोवा पोलिस अधीक्षक राहुल गुप्ता यांनी ही माहिती दिली.

तिसवाडी उपजिल्हाधिकाऱ्यांनी अँथनी नाडार, फ्रान्सिस नाडार व मिंगेल अराउजो या तीन संशयितांना प्रत्येकी ५० हजारांचा जामीन बाँड भरण्याचे निर्देश दिले. मात्र त्‍यांनी ही अट पूर्ण न केल्याने त्यांना पाच दिवसांच्या न्यायालयीन कोठडीत पाठविण्यात आले.

४८ समाजकंटक दक्षिणेत ताब्‍यात

वाढत्या गुन्हेगारीच्‍या पार्श्वभूमीवर दक्षिण गोवा पोलिसांनी आता समाजकंटकांविरोधात कडक पावले उचलली असून, जिल्‍ह्यातील एकूण ४८ जणांना ताब्यात घेतले आहे. कायदा व सुव्‍यवस्था मोडणाऱ्यांची गय केली जाणार नाही, असा इशारा दक्षिण गोवा पोलिस अधीक्षक टिकम सिंग वर्मा यांनी दिला आहे. सार्वजनिक ठिकाणी दारू पिणे, धिंगाणा घालणे अशा प्रवृत्तीवर आम्ही कडक लक्ष ठेवून आहेत असे वर्मा यांनी सांगितले.

रोडरेजवरून हल्ला : चौघांच्‍या मुसक्‍या आवळल्‍या

रोडरेजवरून दोन भावांवर हल्ला चढविल्याप्रकरणी फातोर्डा पोलिसांनी चौघांना अटक केली आहे. काल बुधवारी दुपारी येथील जुन्या ‘हॉस्पिसियो’जवळ ही घटना घडली होती. अब्दुल नबावाले, इम्रान बेल्लारी, इमाम कास्सी व रेहान शेख अशी अटक केलेल्या संशयितांची नावे असून, अधिक तपासासाठी त्यांना चार दिवसांची पोलिस कोठडी घेण्यात आली आहे. मोहम्‍मद रशीद यांनी या प्रकरणी पोलिसांत तक्रार केली होती. ते मूळ उत्तराखंड येथील असून सध्या बाणावली येथे राहतात. संशयितांनी सुरवातीला त्यांना मारहाण केली. त्यांना वाचविण्यासाठी त्यांचा भाऊ सहवीज आला असता त्यालाही बेदम मारहाण केली.