पणजी: व्हिसा संपूनही अनेक विदेशी पर्यटक गोव्यात आसरा घेत आहेत. त्यामुळे राज्यात बेकायदेशीर वास्तव्य करून असलेल्या विदेशी पर्यटकांविरुद्ध धडक विशेष मोहीम सुरू करण्यात आली आहे.

गेल्या तीन दिवसांत ७ - ८ विदेशी पर्यटकांना बेकायदेशीर वास्तव्यप्रकरणी ताब्यात घेऊन त्यांची रवानगी म्हापसा येथील बंदिस्त केंद्रात (डिटेंशन सेंटर) करण्यात आली आहे. किनारपट्टी परिसरात संशयास्पद तसेच रात्री उशिरा फिरणाऱ्या विदेशी नागरिकांची चौकशी करण्यात येत असल्याची माहिती पोलिस अधीक्षक अक्षत कौशल यांनी दिली.

बेकायदेशीर वास्तव्यप्रकरणी तीन गुन्हे मांद्रे, हणजूण व म्हापसा पोलिस स्थानकात दाखल झाले आहेत. भारतात प्रवेश करणाऱ्या विदेशी नागरिकांच्या व्हिसासंदर्भातची माहिती ही परराष्ट्र मंत्रालयाकडे नोंद होत असते. त्यामुळे कोणत्या नागरिकांचा भारतातील वास्तव्याचा व्हिसा संपला याची माहिती कळते. त्यामुळे ते कोठे वास्तव्यास आहेत याचा शोध घेतला जातो.