Mapusa Detention Center: पोलिसांच्या हातावर तुरी! म्हापसा डिटेन्शन सेंटरमधून 3 बांगलादेशी फरार

राज्यात पोलिसांचा धाक उरला आहे का नाही? असा प्रश्न उपस्थित झाला आहे. होय, म्हापसामधून पोलिसांच्या हातावर तुरी देऊन तीन बांगलादेशी नागरिक फरार झाले. डिसेंबर 2023 पासून म्हापसातील डिटेन्शन सेंटरमध्ये असलेले हे तीन बांगलादेशी पळाले. आज (रविवार, 11 ऑगस्ट) पहाटे तीन वाजता ते फरार झाल्याची बातमी समोर आल्याने एकच हल्लकल्लोळ उडाला.

मिळालेल्या माहितीनुसार, पेडणे पोलिसांनी चोरीच्या गुन्ह्यात या तीन बांगलादेशी नागरिकांना पकडले होते. नंतर त्यांना दोषी ठरवण्यात आले होते. त्यानंतर काही दिवसांनी पुन्हा सोडून देण्यात आले होते. त्यानंतर काही कारणांनी त्यांना ताब्यात घेण्यात आले होते. पोलिसांचा हा पकडापकडीचा खेळ सुरु होता. डिसेंबर 2023 पासून म्हापसा येथील डिटेन्शन सेंटरमध्ये हे बांगलादेशी नागरिक होते. दरम्यान, आता पोलिसांच्या तावडीतून कसे निसटले? डिटेन्शन सेंटरमधील लोकांचा त्यांच्या सुटकेत हात आहे का? असे अनेक प्रश्न उपस्थित झाले आहेत.

काही दिवसांपूर्वी, हणजूण पोलिसांनी अमली पदार्थ बाळगल्याप्रकरणी गिनी देशातील नागरिकाला अटक केल्याची घटना समोर आली होती. हणजूण येथील XOXO Bar and Restaurant मध्ये 14 नोव्हेंबरला मध्यरात्री पोलिसांनी छापेमारी केली होती. तेव्हा मलाम कामारा नामक गिनी नागरिकांकडे 01.74 ग्रॅम 'कोकेन' आणि 03.12 ग्रॅम 'अल्थेरटो' ड्रग्ज आढळून आले होते. या ड्रग्जचे याचे बाजारमूल्य अंदाजे 2 लाख होते. अमली पदार्थ बाळगल्याप्रकरणी पोलिसांनी त्याच्या मुसक्या आवळल्या होत्या.