पणजी: लग्नाचे आमिष दाखवून बलात्कार केल्याचा आरोप असलेल्या एका प्रकरणात पीडितेने न्यायालयात धक्कादायक वळण घेतले. माझे आरोपीसोबत लग्न झाले असून मला त्याच्याविरुद्ध कोणतीही साक्ष द्यायची नाही, अशी साक्ष पीडितेने नोंदवल्यामुळे मेरशी येथील ‘पॉक्सो’ न्यायालयाने संशयित विक्रम भिंगारदिवे याची निर्दोष मुक्तता केली.

१८ ऑगस्ट २०२४ रोजी दाखल करण्यात आलेल्या तक्रारीनुसार, संशयिताने २ आणि ३ जून २०२४ दरम्यान नागोवा येथील एका गेस्ट हाऊसमध्ये पीडितेशी लग्नाचे खोटे आमिष दाखवून शारीरिक संबंध प्रस्थापित केले होते. त्यानंतर त्याने लग्नास नकार दिल्याने त्याच्याविरुद्ध गुन्हा दाखल करण्यात आला होता.

सुनावणी दरम्यान, मुख्य साक्षीदार असलेल्या पीडितेने आपली बाजू पूर्णपणे बदलली. तिने न्यायालयात स्पष्ट केले की, तिचा आता आरोपीशी विवाह झाला असून तिला त्याच्याविरोधात काहीही बोलायचे नाही. न्यायालयाने आपल्या निकालात नमूद केले की, पीडिता, जी या प्रकरणातील सर्वात महत्त्वाची साक्षीदार आहे, ती पूर्णपणे ‘फितूर’ झाली आहे. तिने स्वतःच संशयिताशी लग्न झाल्याचे कबूल केल्यामुळे आता त्याला दोषी ठरवण्यासाठी कोणताही ठोस पुरावा उरलेला नाही.