म्हापसा: पीर्ण येथील खुल्या पठारावर शुक्रवारी उत्तर प्रदेशमधील १९ वर्षीय कपिल चौधरी हा युवक मृतावस्थेत आढळला होता. या प्रकरणाचा पोलिसांनी १५ तासांत छडा लावत रेंट अ कार व्यावसायिकासह दोघांना अटक केली. रेंट अ कार चोरल्याच्या संशयातून या तरुणाला जबर मारहाण केल्याचे प्राथमिक तपासात दिसून आले आहे.

याप्रकरणी कोलवाळ पोलिसांनी रेंट अ कार व्यावसायिक गुरुदत्त लवंदे (वय ३१ वर्षे, रा. कांदोळी), डेसन कुतिन्हो (वय ३१ वर्षे, रा. कळंगुट), सूरज ठाकूर (वय २१ वर्षे, रा. कांदोळी) या तिघांना अटक केली आहे. पोलिस अन्य काही साथीदारांच्या मागावर आहेत.

या प्रकरणातील मुख्य संशयित गुरुदत्त याचा रेंट अ कार व्यवसाय आहे. कपिलने गुरुदत्तकडून थार गाडी भाड्याने घेतली होती. ही गाडी महाराष्ट्राच्या हद्दीत नेल्याच्या वादातून मारहाण आणि त्याचे रूपांतर हत्येमध्ये झाल्याचे पोलिसांचे म्हणणे आहे. पोलिस इतरही बाजूने तपास करत आहेत. शवविच्छेदन अहवाल मिळाल्यानंतर कपिलच्या मृत्यूचे नेमके कारण समजणार आहे.

वडील श्रीनिवास सिंग यांनी कपिलच्या मृतदेहाची ओळख पटविली. तसेच आपल्या मुलाचा अज्ञातांनी खून करून त्याची बॅग व मोबाईल चोरल्याची तक्रार नोंदविली होती. त्यानुसार पोलिसांनी अज्ञाताविरुद्ध गुन्हा नोंदवून तपास सुरू केला होता.

...अन् कपिलची ओळख पटली

या प्रकरणाचे तपासकाम सुरू असतानाच श्रीनिवास सिंग (वय ४६ वर्षेे, रा. उत्तर प्रदेश) यांनी कोलवाळ पोलिस स्थानकात येऊन सांगितले की, त्यांचा मुलगा कपिल चौधरी हा गोव्याला जातो म्हणून घरातून निघाला होता. पण त्याचा फोन लागत नाही. त्याचे शेवटचे लोकेशन हे थिवीमध्ये दाखवत होते. पोलिसांनी बेपत्ता तरुण आणि पीर्ण येथील तरुणाच्या मृतदेहाचे वर्णन जुळवून पाहिले असता, तो कपिल चौधरी असल्याचे उघडकीस आले.

दिशाभूल करण्याचा प्रयत्न फसला

संशयित गुरुदत्तने आपल्या साथीदारांच्या मदतीने कपिलला लाथा-बुक्क्यांनी तसेच दंडुक्याने बेदम मारहाण करून त्याला घटनास्थळी सोडून पळ काढला. तसेच जाताना त्याच्या अंगावर दारू ओतून रिकामी बाटली तेथेच सोडून दिली. जेणेकरून ही व्यक्ती दारूच्या नशेत आहे, असे भासविण्याचा संशयितांचा प्रयत्न होता.

नेमके काय घडले?

१. कपिलने गुरुदत्तकडून ३० ऑक्टोबरला जीए-०३-एच-५२५४ क्रमांकाची थार गाडी भाड्याने घेतली होती. या गाडीला जीपीएस ट्रॅकर होता.

२. ही गाडी गोव्याची सीमा ओलांडून महाराष्ट्रात दाखल झाल्याचे समजल्यावर गुरुदत्तने मित्रांसोबत कारने थारचा पाठलाग करीत ती शोधली.

३. थार गाडी कणकवलीत सापडली. यावेळी गाडीत कपिल होता. संशयितांनी कपिलला थार गाडीसोबत पीर्ण येथील पठारावर नेले.

४. संशयितांनी कपिलला लाथा-बुक्क्यांनी तसेच दंडुक्याने बेदम मारहाण केली आणि त्याच अवस्थेत सोडले.