Panaji : पणजी महानगरपालिकेने पुढील तीन वर्षांसाठी पे पार्किंगसाठी नव्याने निविदा काढली आहे. त्यात महत्त्वाची बाब म्हणजे कंत्राटदाराला आता रविवारीही पार्किंग शुल्क आकारण्याची संधी मिळणार आहे.

मनपाने काढलेल्या निविदेनुसार, चारचाकी वाहनांना पहिल्या चार तासांसाठी २० रुपये आणि अतिरिक्त तासासाठी १५ रुपये तर दुचाकींना चार तासांपेक्षा कमी वेळेसाठी ४ रुपये, ४ ते १२ तासांसाठी ८ व १२ ते २४ तासांसाठी १५ रुपये शुल्क आकारण्यात येणार आहे. विशेष म्हणजे पाटो परिसर पे-पार्किंगमध्ये आल्याने यावेळी निविदा रक्कम अधिक असेल त्या कंत्राटदाराला हे कंत्राट मिळणार आहे.

मनपाने कंत्राटदारांना नेहमीप्रमाणे अटी घातलेल्या आहेत. आत्तापर्यंत रविवारी पे-पार्किंग शुल्क आकारले जात नव्हते, ते आता कंत्राटदाराला आकारता येणार आहे. मनपाच्‍या येत्या बैठकीत या विषयावर चर्चा होणार आहे.