सासष्टी: पंचायत निवडणुकांच्या तारखा अधिकृतपणे जाहीर झालेल्या नाहीत. जास्त करून जून महिन्याच्या दुसऱ्या आठवड्यात त्या घेतल्या जाण्याची शक्यता आहे. आतापर्यंतचा अनुभव पाहता पंचायत निवडणुका जास्त करून रविवारी घेतल्या जातात. त्याप्रमाणे त्या 12 जून रोजी घेण्याची शक्यता नाकारता येत नाही, अशी माहिती पंचायतमंत्री माविन गुदिन्हो यांनी दिली.

मडगावातील एका कार्यक्रमानिमित्त आल्यावर पंचायतमंत्री गुदिन्हो यांना यासंदर्भात प्रश्र्न विचारला, तेव्हा त्यांनी सांगितले की, गोव्यातील पंचायत निवडणुका 4 जून रोजी होतील, असा अंदाज होता. परंतु पंचायतीचे प्रभाग निश्र्चित करण्याची प्रक्रिया अद्याप पूर्ण झालेली नाही.

तसेच पंचायत निवडणुकीसाठी कुठले कुठले प्रभाग आरक्षित केले जातील, याचाही निर्णय झालेला नाही. त्यामुळे पंचायत निवडणुका एका आठवड्याने पुढे ढकलाव्या लागतील, असे माविन गुदिन्हो त्यांनी यावेळी सांगितले.