सासष्टी: गोव्यातील पंचायत निवडणुकांची तारीख अजून निश्र्चित झालेली नसून सध्या पंचायत क्षेत्राच्या मर्यादा निश्र्चित करण्याची प्रक्रिया सुरू असून हे काम पूर्ण झाल्यावर तारखा ठरविल्या जातील, असे पंचायतमंत्री माविन गुदिन्हो यांनी सांगितले. भारतीय जनता पक्षाचे राज्य प्रवक्ते उर्फान मुल्ला यांनी आयोजित केलेल्या इफ्तार मेजवानीला ते उपस्थित होते, तेव्हा पत्रकारांशी ते बोलत होते. (Goa panchayat election date not yet decided says Gudinho)

पंचायतीचे क्षेत्र निश्र्चित करण्याच्या प्रक्रियेला लोकांचा विरोध असणे स्वाभाविक आहे. राज्य सरकारने किंवा राज्य निवडणूक आयोगाने (Election Commission) ही प्रक्रिया केली तरी त्याला विरोधच असणार आहे. एकाच बरोबर सर्वांचे समाधान करता येत नाही. यासंबंधीची कागदपत्रे राज्य निवडणूक आयोगाला सुपूर्द करण्यात आली आहेत. ही प्रक्रिया राज्य निवडणूक आयोगातर्फे सुरू असल्याने सरकार (Government) त्यामध्ये हस्तक्षेप करू शकत नाही, असेही गुदिन्हो यांनी सांगितले.

दरम्यान, इफ्तार मेजवानीला मंत्री गुदिन्हो व्यतिरिक्त माजी खासदार नरेंद्र सावईकर, माजी उपमुख्यमंत्री चंद्रकांत ऊर्फ बाबू कवळेकर, मनोहर ऊर्फ बाबू आजगावकर, आमदार दाजी साळकर, आमदार रेजिनाल्ड लॉरेन्स, आमदार उल्हास तुयेकर, रुपेश महात्मे, शर्मद पै रायतुरकर, नगरसेवक सदानंद नाईक, बबिता नाईक, घनश्याम शिरोडकर, महेश आमोणकर आदी उपस्थित होते.

उर्फान मुल्ला यानी सांगितले, की गोव्यातील सर्व समाज एकसंध आहे हे सिद्ध करण्यासाठी ही मेजवानी आयोजित करण्यात आली होती. सध्या गोव्यात समाजांमध्ये फूट पाडण्याचे प्रयत्न चालू आहेत. मात्र, गोव्यातील (Goa) सर्व समाजातील लोक अपप्रचाराला कधीच बळी पडणार नाहीत, असे मुल्ला यांनी सांगितले.