Goa Panchayat: गोवा राज्यात रस्ते अपघातांच्या संख्येत वाढ होत असल्याने रस्ता सुरक्षेवर अधिक भर दिला जात आहे. याचाच भाग म्हणून गोवा रस्ते सुरक्षा संघटनेतर्फे राज्यातील पंचायतींमध्ये रस्ते सुरक्षा मंडळ स्थापन करण्यासाठी प्रयत्न सुरू आहेत.

राज्यातील सर्व 191 पंचायतींमध्ये येत्या काळात कार्यकर्ते प्रशिक्षित करून त्यांना कार्यरत करण्याचा विचार सुरू असल्याची माहिती रस्ते सुरक्षा कार्यकर्ते आणि गोवा रस्ते सुरक्षा संघटनेचे अध्यक्ष दिलीप नाईक यांनी दिली.

पंचायत क्षेत्रातील रस्ता सुरक्षेबद्दल जास्त बोलले जात नाही. त्यासाठी येथे जागरूकता निर्माण करून कार्यकर्त्यांना प्रशिक्षण देण्याची वेळ आली आहे. सार्वजनिक बांधकाम, वाहतूक पोलिस आणि रस्ता सुरक्षेशी पंचायत क्षेत्रातील कामे ते करणार आहेत. तसेच प्रत्येक पंचायतीतील रस्ता सुरक्षा मंडळ आणि वाहतूक व्यवस्थापन समितीदेखील गठित केली जाईल.

पंचायत क्षेत्रातील रस्ता सुरक्षा आणि वाहतूक व्यवस्था सुरळीत करण्याच्या दिशेने हे काम केले जात आहे, असे नाईक यांनी सांगितले. कार्यकर्त्यांना संघटनेकडून प्रशिक्षण देण्यात येणार आहे. तसेच पंचायतीतील बैठका, त्या क्षेत्रातील रस्त्यांचे सर्वेक्षण आणि समस्या यांचे अहवाल तयार करून त्यावर तोडगा काढण्याचे काम केले जाईल, असे नाईक म्हणाले.