Babush Monserrat पणजी पोलिस स्थानक हल्लाप्रकरणी सुरू असलेल्या सुनावणीस कायमस्वरूपी गैरहजर राहण्यासाठी परवानगी मिळावी, यासाठी महसूलमंत्री बाबूश मोन्सेरात आणि त्यांच्या पत्नी आमदार जेनिफर मोन्सेरात यांनी न्यायालयात केलेल्या अर्जाला सीबीआयने आक्षेप घेतला आहे.

संशयितांना अशी परवानगी देऊ नये, असा अर्ज आज शुक्रवारी सीबीआयने न्यायालयात सादर केला आहे.

दक्षिण गोव्याचे प्रधान सत्र न्यायाधीश इर्शाद आगा यांच्यासमोर ही सुनावणी सुरू असून सीबीआयचे वकील नौशाद यांनी हा अर्ज सादर केला. आता या अर्जावर पुढील शुक्रवारी निकाल देण्यात येणार आहे.

आपल्या कार्यकर्त्यांना अटक केली; परंतु दुसऱ्या गटातील संशयितांना का अटक केली नाही, याचा जाब विचारण्यासाठी मोन्सेरात दाम्पत्य कार्यकर्त्यांसह पोलिस स्थानकावर चाल करून आले होते. त्यावेळी बाबूश मोन्सेरात यांनी प्रक्षोभक भाषण केले असता, जमावाने खवळून पोलिस स्थानकावर हल्ला केला आणि मोडतोड केली, असा सीबीआयचा आरोप आहे.

सुनावणी तहकूब

माजी वीजमंत्री माविन गुदिन्हो यांच्या विरोधातील वीज बिल सवलत घोटाळा प्रकरणातील साक्षीदार सुभाष शिरोडकर हे आरोग्याच्या कारणास्तव सुनावणीस गैरहजर राहिल्याने ही सुनावणी 28 जुलैपर्यंत तहकूब करण्यात आली.