बाप्पाच्या आगमनाला आठवडाच राहिल्याने राज्यात खरेदीला ऊत आला आहे. पणजीत भरलेल्‍या अष्टमीच्या फेरीतून सजावटीसाठी लागणारे साहित्य, कपडे तसेच इतर साहित्य जसे की सोफा सेट, विविध प्रकारची भांडी, कपाटे, टेबलक्लॉथ आदी खरेदी करण्‍यास झुंबड उडत आहे. मात्र वाढत्‍या महागाईमुळे सर्वसामान्‍य लोकांना हात आखुडते घ्‍यावे लागत आहेत.

गणेश चतुर्थीत (Ganesh Chaturthi) सजावटीचे साहित्य जसे कृत्रित फुलांचे हार, विविध प्रकारचे पडदे, रोषणाईसाठी लागणाऱ्या विद्युत माळा, थर्माकोलचे मखर, पताका आदी साहित्य दाखल झाले आहे. हारांची किंमत आकाराप्रमाणे, त्याच्या दर्जानुसार 100 ते 450 रूपयांपर्यंत आहे. सजावटीसाठी लागणाऱ्या माळा 100 ते 250 रूपये व त्याहून अधिक किंमतीच्या दरात उपलब्ध आहेत. पूजेसाठी लागणारे साहित्य देखील उपलब्ध झाले आहे.

अष्टमीच्या फेरीला संध्याकाळच्या सुमारास अधिक गर्दी होत आहे. संध्याकाळच्या सुमारास अनेक लोक कामावरून घरी परतताना खरेदी करताना दिसतात. जसजशी चतुर्थी जवळ येत आहे, तसतशी गर्दी वाढत चालली आहे. सजावटीसाठी लागणारे साहित्‍य, फर्निचर, कपडे आदी वस्‍तूंना मोठी मागणी आहे.