Goa Environment News: कृषी संचालनालयाकडून ‘पाणी वाचवा-माती वाचवा’ मोहीम जागृतीसंदर्भात शनिवारी दि. 19 नोव्हेंबर रोजी मोटारसायकल रॅली आयोजित करण्यात आली आहे. या रॅलीत कृषी खात्याचे अधिकारी आणि काही शेतकरी सहभागी होणार असून तेरेखोल किल्ला ते काब दी राम किल्ला असा रॅलीचा प्रवास असेल.

पेडणेचे आमदार प्रवीण आर्लेकर यांच्या हस्ते सकाळी 9 वाजता रॅलीचा शुभारंभ होणार असून साखळी येथे मुख्यमंत्री डॉ. प्रमोद सावंत आणि फोंड्यात कृषीमंत्री रवी नाईक रॅलीचे स्वागत करतील, अशी माहिती कृषी खात्याचे संचालक नेव्हिल आल्फोन्सो यांनी दिली.

आज अनेक शेतकरी रासायनिक खतांचा अतिवापर करीत आहेत. हे असेच सुरू राहिल्यास भविष्यात मातीतून काहीच उत्पन्न मिळणार नाही. तसेच जास्त प्रमाणात मातीत पाण्याचा वापर झाल्यास मातीवर परिणाम होऊ शकतो.

शिवाय पाणी वाया जाते. त्यासाठी पाणीही काळजीपूर्वक वापरण्याची आवश्‍कता आहे. पावसाचे पाणी साठवून ठेवले पाहिजे, असे आवाहन आल्फोन्सो यांनी केले.