मोरजी: पेडणे तालुक्यातील पर्यटनदृष्ट्या महत्त्वपूर्ण असलेले मोरजी आणि आश्‍‍वे-मांद्रे हे दोन समुद्रकिनारे कासव संवर्धन मोहिमेमुळे संवेदनशील तसेच ‘सायलंट झोन’ म्हणून सरकारने जाहीर केले. स्‍थानिकांनी सरकारच्‍या या निर्णयाविरोधात ‘ब्र’सुद्धा काढला नाही. परंतु आता शांत किनाऱ्यांना लागलेले ध्‍वनिप्रदूषणाचे ग्रहण कोण सोडवणार? असा संतप्‍त सवाल नागरिक उपस्‍थित करीत आहेत.

पर्यटकांची तोबा गर्दी

दरम्यान, पूर्वी या किनारी भागात नोव्हेंबर ते मे महिन्यापर्यंतच पर्यटक यायचे. परंतु आता काळ बदलला, नियम बदलले. त्यामुळे वर्षाचे 365 दिवसही पर्यटक वरील दोन किनाऱ्यांबरोबरच हरमल, केरी, तेरेखोल या किनारी भागातही मोठ्या संख्‍येने येतात.

काही विदेशी पर्यटक पर्यटनाच्या नावावर बेकायदेशीर व्यवसाय, उद्योगधंदेही करतात. मोरजी किनारी भागात वनखात्याने 1997 पासून कासव संवर्धन मोहीम राबवली जाते. ही मोहीम आजपर्यंत यशस्वीपणे राबवण्याची किमया वन खात्याने साधली आहे. त्‍यामुळे मोरजी, आश्‍‍वे-मांद्रे हे दोन संवेदनशील किनारे म्हणून ओळखले जातात.

समुद्रकिनारी भागात रात्री दहानंतर संगीत वाजवण्यास निर्बंध आहेत. परंतु पोलिस याबाबत अनभिज्ञ आहेत का, असा प्रश्‍‍न पडतो. पेडणे तालुक्यातील मोरजी, आश्‍‍वे-मांद्रे, हरमल या किनारी भागात ध्वनिप्रदूषण करणाऱ्यांवर पोलिसांनी आतापर्यंत काय कारवाई केली आहे, हा एक संशोधनाचा विषय आहे, अशी संतप्त प्रतिक्रिया एका ग्रामस्थाने दिली.

तर दुसऱ्याने म्हटले की, पर्यटकांचे आकर्षण ठरतात ते समुद्रकिनारे. पण मागील काही वर्षांपासून समुद्र किनाऱ्यांवर होणाऱ्या पार्ट्या, कर्णकर्कश संगीत यामुळे हे शांत किनारे आता अशांत भासू लागले आहेत. स्थानिक लोकांची या आवाजाने झोपच उडाली आहे. त्यामुळे प्रशासनाने वेळीच करवाई करावी.