Goa News: काणकोण येथील एक टँकरचालक आणि इतरांना भाटपाल येथील काही युवकांनी बेदम मारहाण करून त्यांना रस्त्यावर गुडघे टेकवून पंचसदस्याची माफी मागण्याची सक्ती केली. या प्रकाराचा धनगर समाज उन्नती मंडळाच्या काणकोण शाखेने आज पत्रकार परिषद घेऊन जाहीर निषेध केला. या पत्रकार परिषदेला काणकोण शाखेचे अध्यक्ष तुकाराम बावधान, आलोक मोडक, गंगो झरो, रूपेश झरो, बाबू वरक, बाबू झरो, दिनू जंगले, स्वप्नेश झरो, सगो झरो, विठ्ठल वरक, तसेच अन्य सदस्य उपस्थित होते.

शुक्रवारी सगो झरो हे श्रीस्थळहून जलपुरवठा खात्यामार्फत गावडोंगरी आणि खोतिगाव पंचायत क्षेत्रांत पाणी पुरविण्यासाठी जात असता, भाटपाल येथील काही युवकांनी त्यांचा टँकर अडवून त्यांच्यासह मित्राला बेदम मारहाण केली. जोपर्यंत तुम्ही ‘त्या’ पंचायत सदस्याची माफी मागणार नाही, तोपर्यंत सुटका केली जाणार नाही, अशी तंबी दिली. यासंदर्भात सगो झरो यांनी शुक्रवारी रात्री उशिरा काणकोण पोलिसांत पाचजणांविरोधात तक्रार दाखल केली आहे. छोट्या समाजावर होणारा अन्याय खपवून घेणार नसल्याचे मोडक यांनी सांगितले.

प्रकरणाला पूर्ववैमनस्याची किनार

यासंदर्भात काणकोण पोलिसांनी आज (शनिवारी) त्या पाचजणांना पोलिस ठाण्यात बोलावून प्राथमिक चौकशी केली, असे काणकोणचे पोलिस निरीक्षक हरिष राऊत देसाई यांनी सांगितले. ही घटना पूर्ववैमनस्यातून घडली का, हे तपासून पाहण्यात येत आहे. यासंदर्भात सभापती रमेश तवडकर यांनाही निवेदन देणार असल्याचे आलोक मोडक यांनी सांगितले.