Goa News: नॅशनल असोसिएशन फॉर ब्लाईंड (एनएबी), गोवा शाखेच्या वरिष्ठ सल्लागार तथा मुख्य शिक्षिका लीना प्रभू यांचे आज अल्प आजाराने निधन झाले. लीना प्रभू यांनी अंधांच्या सेवेसाठी प्रदीर्घ काळ कार्य केले आहे.

एनएबी इंडिया आणि एनएबी, गोवा शाखेसाठी त्यांनी चार दशके सेवा बजावली आहे. त्या एनएबी, गोवा शाखेत २००१ साली दाखल झाल्या होत्या. आणि तेथील मुलांसाठी त्यांचे स्थान हे मातेसमान होते. अत्यंत प्रेमळ, काळजी वाहणाऱ्या आणि अंधांसाठी समर्पित भावनेने त्यांनी काम केले आहे.

त्यामुळे त्यांनी एनएबी सोडल्यानंतरही तेथील विद्यार्थी त्यांच्या संपर्कात राहिले. ओरिएंटेशन आणि मोबिलिटीच्या शिक्षिका या नात्याने त्यांनी घेतलेल्या अनुभवांवर आधारीत त्यांनी ‘लाईट टुवर्डस्‌ इंडिपेंडन्स’ हे पुस्तक लिहिले आहे.

त्यांनी अनेक पुरस्कार प्राप्त केले असून त्यात रिहॅबिलिटेशन कौन्सिल ॲक्ट ऑफ इंडिया (नवी दिल्ली), नॅशनल सोसायटी ऑफ इक्वल अपॉर्च्युनिटीज फॉर डिसेबल्ड, प्रगत मराठी ब्रेल साठी लुईस ब्रेल मेमोरियल रिसर्च सेंटर आदींकडून मिळालेल्या प्रमाणपत्रांचा समावेश आहे.

त्यांच्या निधनामुळे आपली अपरिमीत हानी झाली असल्याचे एनएबीने म्हटले आहे.