रामनगर-गोवा राष्ट्रीय महामार्गावरील अनमोड घाटात दुचाकी अपघाताची गंभीर घटना घडून जोयडा तालुक्यातील कुरवई येथील २५ वर्षीय युवकाचा दुर्दैवी मृत्यू झाला. सचिन सावर्डेकर असे मृताचे नाव असून, या अपघातात अमर ठाकूर (रा. सोनारवाडी) हा युवक गंभीर जखमी झाला आहे. ही घटना सोमवारी रात्री सुमारे नऊच्या सुमारास अनमोड घाटातील आरटीओ तपासणी नाक्याजवळ घडली.

प्राप्त माहितीनुसार, सचिन आणि अमर हे दोघे दुचाकीवरून गोव्याच्या दिशेने प्रवास करत होते. घाटातील वळणदार आणि उताराच्या रस्त्यावर दुचाकीवरील नियंत्रण सुटल्याने वाहन थेट रस्ता दुभाजकाला जाऊन जोरदार धडकले.

धडक इतकी भीषण होती की दोन्ही युवक गंभीर जखमी झाले. स्थानिक नागरिकांनी तत्काळ मदतकार्य करत दोघांनाही रुग्णवाहिकेद्वारे रामनगर येथील रुग्णालयात दाखल केले. सचिन सावर्डेकर याची प्रकृती गंभीर असल्याने डॉक्टरांनी त्याला बेळगाव येथील उच्च उपचारासाठी पाठवण्याचा सल्ला दिला.

मात्र बेळगावकडे नेत असताना वाटेतच त्याची प्राणज्योत मालवली. जखमी अमर ठाकूर याच्यावर रामनगर येथील खासगी रुग्णालयात उपचार सुरू असून त्याची प्रकृती स्थिर असल्याचे समजते. मृत सचिन सावर्डेकर हा गोव्यातील एका खासगी कंपनीत कार्यरत होता.

त्याच्या अचानक मृत्यूमुळे कुरवई आणि परिसरात शोककळा पसरली आहे. कुटुंबीय, मित्रपरिवार आणि ग्रामस्थांनी हळहळ व्यक्त केली आहे. रामनगर पोलिसांनी अपघाताची नोंद घेत पुढील तपास सुरू केला असून अपघाताच्या कारणांचा शोध घेतला जात आहे.