मोरजी : मोरजी पंचायत क्षेत्रातील तेमवाडा समुद्रकिनारी भागात पर्यटक तसेच स्थानिक मोठ्या संख्येने येतात. मात्र, पार्किंगची योग्य व्यवस्था नसल्याने वाहने रस्त्याच्या दोन्ही बाजूंना अनियमितपणे उभी केली जातात. परिणामी, वाहतूक कोंडीची समस्या दिवसेंदिवस गंभीर होत आहे. रविवार व सुट्टीच्या दिवशी या किनारी भागातील मुख्य रस्त्यावर वाहतूक मोठ्या प्रमाणात वाढते. त्यामुळे ट्राफिक पोलिस तैनात करून कोंडीवर नियंत्रण ठेवावे, अशी मागणी पंच मुकेश गडेकर यांनी केली आहे. समुद्रकिनारी भागात देश-विदेशातील पर्यटक मोठ्या संख्येने येतात.

एप्रिल-मे महिन्यात गोमंतकीय व देशी पर्यटक गटागटांनी समुद्रस्नानासाठी येथे गर्दी करतात. मात्र, पार्किंग सुविधेअभावी वाहनचालक रस्त्यावरच वाहने उभी करतात. काही वाहनचालकांना घाई असल्याने परिस्थिती अधिकच बिघडून कोंडी निर्माण होते.

पार्किंग प्रकल्पाचे काय?

• दरवर्षी पर्यटन हंगामात सरकार विविध उपक्रम राबवते. त्याअंतर्गत तेमवाडा समुद्रकिनारी बहुउद्देशीय पार्किंग प्रकल्प उभारण्याची घोषणा करण्यात आली होती. याचे भूमिपूजनही झाले होते. मात्र, काही नागरिकांनी न्यायालयात धाव घेतल्याने प्रकल्प अद्याप रखडला आहे. आता हा प्रकल्प कधी साकारला जाणार याकडे लक्ष लागले आहे.

• सरकारने आवश्यक कायदेशीर प्रक्रिया पूर्ण करून हा प्रकल्प लवकरात लवकर मार्गी लावल्यास रस्त्यावर होणारे अनियमित पार्किंग आणि त्यातून निर्माण होणारी वाहतूक कोंडी मोठ्या प्रमाणात कमी होऊ शकते. यासाठी स्थानिक पंचायत, तसेच आमदार जीत आरोलकर यांनी पुढाकार घ्यावा, अशी मागणी नागरिकांकडून होत आहे.