Mopa Airport: मोपा विमानतळ प्रकल्प उभारणाऱ्या ‘जीएमआर’ कंपनीचे दिल्ली, हैद्राबाद आणि बंगळूर असे तीन विमानतळ आहेत. या तिन्ही विमानतळांवरून गोव्याकडे येणारी विमाने 14 डिसेंबरपासून दक्षिण गोव्यातील दाबोळी विमातळावर न उतरता ‘मोपा’वर उतरणार आहेत. तसेच अजून 17 नवे मार्ग ‘मोपा’कडे वळविले जाणार असल्याची माहिती सूत्रांनी दिली.

जीएमआर एअरपोर्ट इन्फ्रास्ट्रक्चर लिमिटेड या कंपनीकडे स्वत:चे आणि विकसित करण्यासाठी घेतलेले असे राष्ट्रीय आणि आंतरराष्ट्रीय मिळून 21 विमानतळ आहेत. या विमानतळांवरून गोव्याकडे येणारी सर्व विमाने ही भविष्यात मोपावर उतरवली जातील. सुरवातीला दिल्ली, हैद्राबाद आणि बंगळूर या तीन ठिकाणची विमाने मोपाच्या दिशेने वळविण्याचे निश्‍चित झाले आहे.

सर्व विमान कंपन्यांना या नव्या बदलाची कल्पना देण्यात आली असून इंडिगोसह इतर कंपन्यांची सहमती असेल, असेही एका अधिकाऱ्याने ‘गोमन्तक’ला सांगितले. ‘सकाळी 8 ते 11 या तीन तासांत ‘दाबोळी’वर एकही नागरी विमान उतरवू किंवा उड्डाण घेऊ शकत नाही. या तीन तासांसाठी विमान वाहतूक ‘मोपा’ला होणार व 23 विमाने उतरली जाणार असल्याने नवे 17 मार्ग ठरविण्यात आले आहेत.

यामध्ये दिल्ली, हैद्राबाद, चेन्नई, कोलकाता, नागपूर, लखनऊ, चंदिगढ, अहमदाबाद या विमानतळांचा समावेश आहे’, असे या अधिकाऱ्याने सांगितले.

ओमानचा निर्णय

जीएमआर कंपनीकडे ओमान, ग्रीसमधील हेराकलीओन व फिलिपिन्समधील मेकटन विमानतळ आहेत. रशियातील एक विमानतळ दुरुस्तीसाठी घेण्यात आल्याची माहिती अधिकाऱ्याने दिली. ओमानने आपले विमान ‘मोपा’ला लॅंडिंग करण्याचे यापूर्वीच जाहीर केले आहे. तेथे तिकीट बुकिंगवेळी विमान मोपाला उतरवणार याची कल्पना दिली जात असल्याचे अधिकाऱ्याने सांगितले.

गोव्याच्या पर्यटनात भर-

भारताची राजधानी दिल्ली हे शहर अत्यंत महत्त्वाचे असून ‘मोपा’ यापुढे थेट या शहराशी जोडले जाणार आहे. तर ‘आयटी’ची राजधानी म्हणून बंगळूरकडे पाहिले जाते. शनिवार, रविवार आणि सुट्टीच्या हंगामात गोव्याला येण्यासाठी विमानसेवेची मागणी वाढते. अशावेळी हे विमानतळ ‘मोपा’ला जोडले गेल्यावर दळणवळणात अधिक भर पडेल. तसेच गोव्याच्या पर्यटनासाठी ते पोषक ठरेल.