Goa Monsoon Update 2023: यंदा पावसाने उशिरा हजेरी लावली मात्र त्याचे रौद्र रूप पाहायला मिळाले. गोव्यात मागील काही दिवसांपासून पावसाने थोडी विश्रांती घेतली आहे. भारतीय हवामानशास्त्र विभागाने दिलेल्या माहितीनुसार, जुलैमध्ये गोव्यात सर्वाधिक पाऊस पडला. यावेळी 1836.2 मिमी पावसाची नोंद झाली आहे.

या मोसमातील आतापर्यंतचा सर्वाधिक 24 तासांमधील पाऊस 152.5 मिमी २८ जूनला नोंदवला गेला. जुलैमध्ये सर्वाधिक 131.2 मिमी पावसाची 6 जुलैला नोंद झाली. मागील 15 दिवसांपासून पावसाने उसंत घेतली आहे.

जुलैमधील पावसाने 26.8% अतिरिक्त प्रमाणात पडलेला पाऊस आता10.2% पर्यंत कमी झाला आहे. गेल्या काही दिवसांपासून मान्सून प्रमाण कमी असल्याने IMD तर्फे सर्वाधिक पाऊस म्हणून फक्त 7.8 मिमी पाऊस नोंदवण्यात आला आहे. मात्र अजून आठवड्याभरात पुन्हा पावसाच्या जोरदार सरी कोसळण्याची शक्यता असल्याचे सांगण्यात येत आहे.

शंभरी पार!

राज्यात 22 जूनपर्यंत गायब झालेल्या पावसाने पुढील 34-35 दिवसांत धमाल उडविली. त्यापैकी 27 दिवसांत पडलेल्या अतिरिक्त पावसाने यंदा इंचाची शंभरीही लवकरच गाठली.

गेला आठवडाभर पावसाने उसंत घेतली असली, तरी हलक्या आणि मध्यम स्वरूपात पडणाऱ्या सरींनी आज अखेर 100.10 इंचाची नोंद केली.