राज्यात गेल्या काही दिवसांपासून पावसानं थैमान घातलं आहे. सातत्याने पडत असलेल्या पावसामुळे राज्यातील जनजवीन विस्कळीत झाले आहे. एकीकडे दरडी कोसळून वाहतूक बंदी झाली आहे तर दुसरीकडे पडझडीच्या घटना सातत्याने समोर येतायेत. यातच आज, गोव्यात हवामान खात्याने (शुक्रवार, 20 जुलै) ऑरेंज अलर्ट वर्तवला असून मुसळधार पावसाचा इशारा दिला आहे.

हवामान खात्याने वर्तवलेल्या अंदाजानुसार, आज राज्यात मुसळधार पावसाची शक्यता असून, 21, 22, 23 आणि 24 जुलै रोजी ऑरेंज अलर्ट वर्तवण्यात आला आहे.

आज ऑरेंज अलर्ट

हवामान खात्याच्या अंदाजानुसार राज्यात पुढील एक ते तीन तासात मुसळधार पावसाची शक्यता आहे. अरबी समुद्रासह दक्षिण आणि उत्तर गोव्यावर (North Goa) सध्या पावसाचे ढग असल्याचे हवामान खात्याने म्हटले आहे.

गेल्या 24 तासात पावसाची नोंद

गेल्या चोवीस तासांत म्हापसा, पेडणे, फोंडा (Ponda) आणि राजधानी पणजीत पावसाची सर्वाधिक नोंद झाली आहे. राज्यात सातत्याने पडत असणाऱ्या पावसामुळे पूरसदृश्य परिस्थिती निर्माण झाली आहे. काही-काही ठिकाणी लोकांच्या घराममध्ये पाणी शिरले आहे. तर रस्त्यांना नद्यांचे स्वरुप प्राप्त झाले आहे.