Goa Accident सध्या राज्यात मुसळधार पाऊस कोसळत असून दरड कोसळण्याच्या आणि पडझडीच्या घटना घडत आहेत.

रविवारी एका चारचाकीवर भलेमोठे आंब्याचे झाड कोसळल्याची घटना शिवोली येथील क्षेत्रपाल मंदिरानजीक घडली. GA06 T 6990 नोंदणी क्रमांक असलेल्या Ertiga गाडीवर रस्त्यालगतचे आंब्याचे भले मोठे झाड पडल्याने कारचे मोठे नुकसान झाले. याव्यतिरिक्त झाडालगतचे विजेचे तीन खांब उन्मळून पडल्याने या परिसरातील वीज पुरवठा खंडित झाला आहे.

या कार मधून काही पर्यटक प्रवास करत होते. गोवा पर्यटन करून ते दिल्लीला परतत असताना ही घटना घडली. वाहनात असलेल्या व्यक्तींविषयी पुढील माहिती उपलब्ध झालीय.

गोवा पासिंगची ही एर्टिगा गाडी लक्षवीर सिंग (वय ४० वर्षे) हे चालवत असून त्यांच्या सोबत पत्नी: प्रिया सिंग (वय 36 वर्षे), मुलगी: मीरा सिंग (वय 5 वर्षे), बहीण: रितू धैया (वय 34 वर्षे), भाची: समायरा धैय्या (4 महिन्यांची) असे मिळून 5 जण प्रवास करत होते.

सदर पर्यटक फॉर्च्युन कासा बिल्डिंगमध्ये राहत असून आज ते दिल्लीला जाण्यासाठी विमानतळाकडे जात होते. प्रवासादरम्यान 100 वर्षांहून अधिक जुने असलेले आंब्याचे झाड उन्मळून त्यांच्या कारवर पडले. त्यांच्यापैकी दोन अल्पवयीन जखमी झाले असून रितू धैया ही 34 वर्षीय महिला किरकोळ जखमी झाली.

घटनेची माहिती मिळताच म्हापसा अग्निशमन दलाच्या जवानांनी घटनास्थळी धाव घेत स्थानिकांच्या मदतीने फांद्या तोडण्यास सुरुवात केली. आॅक्सेलचे सरपंच प्रवीण कोचरेकर यांच्यासह उपसरपंच रेशल हरमलकर आदींनीही घटनास्थळी धाव घेतली.

झाड वीज वाहिन्यांवर पडल्याने वीज वाहिन्यांतुटून शिवोलीमधील फॉर्च्यून कासा इमारतीमधील आणि आजूबाजूच्या परिसरातील वीज पुरवठा खंडित झाला आहे.

रविवारी धारगळ येथे दरड कोसळाळुन माती मुंबई-गोवा महामार्गावर आल्याची घटना घडली आहे. राज्यात पावसाची संततधार सुरु असून सखल भागात पाणी साचले असून अनेक छोटे पूल पाण्याखाली गेले आहेत.