Goa Monsoon 2023 राज्यात पडणाऱ्या मुसळधार पावसामुळे जनजीवन विस्कळीत झाली असून राज्यात बहुतांश भागात पडझडीच्या घटना सुरु आहेत. कळंगुट येथील नाझरी रिसॉर्ट पार्किंगजवळ हुंदाई कार (i20) (गाडी नंबर GA - 03 W 7752) आणि बजाज पल्सर बाईकवर (गाडी नंबर GA - 03 S 9342) झाड पडल्याची घटना घडली असून यात दोन्ही वाहनाचे नुकसान झाले आहे. सुदैवाने यात जीवितहानीसारखा अनर्थ घडला नाही. सदरची घटना दुपारी 12 च्या सुमारास घडली.

या घटनेची माहिती मिळताच पिळर्ण अग्निशमन दलाच्या जवानांनी घटनास्थळी धाव घेत या दोन्ही गाड्यांवर पडलेले भले मोठे झाड कापून बाजूला केले. या घटनेत सुमारे 1 लाखाचे नुकसान झाले आहे. दरम्यान पावसामुळे राज्यभरात पडझड होण्याच्या घटनांमध्ये वाढ झाली आहे. ठिकठिकणी रस्त्यावर झाडे कोसळत असल्यामुळे नागरिकांना अडचणीचा सामना करावा लागत आहे.

गोव्यात पुढील पाच दिवसांसाठी ऑरेन्ज अलर्ट जारी करण्यात आला आहे. पुढील पाच दिवस गोवा, कोकण आणि मध्य महाराष्ट्रात मुसळधार पाऊस पडण्याची शक्यता हवामान खात्याने वर्तवली आहे. नागरिकांना सतर्कतेचा इशारा देण्यात आला आहे. साखळीत वाळवंटी नदी तुडूंब भरून वाहत असून सर्व सखल भागांमध्ये पाणी भरण्यास सुरुवात झाली असूनपूरसदृष्य स्थिती उद्‍भवली आहे.