Goa Monsoon 2023 मागील काही दिवसांपासून दडी मारलेला पाऊस चतुर्थीच्या काळात सक्रिय झाल्याने गणेशभक्तांच्या उत्साहावर विरजण पडले आहे. हवामान खात्याने आज (शुक्रवारी) आकाश निरभ्र राहील, असा अंदाज वर्तविला होता;

परंतु हा अंदाज फोल ठरवत सायंकाळी पावसाने पुन्हा जोरात सुरवात केली. मागील २४ तासांत राज्यात एकूण ३१.७ मि.मी. पावसाची नोंद झाली असून एकूण ३०४६ मि.मी म्हणजेच ११९.९२ इंच पावसाची नोंद झाली आहे.

गुरुवारी सकाळपासून दाणादाण उडविणाऱ्या पावसाने रात्री ११ च्या सुमारास विश्रांती घेतली. आज सकाळपासून आकाश मोकळे होते.

त्यामुळे लोक नातेवाईक, मित्रांच्या घरी श्रींच्या दर्शनाला निघाले. मात्र, दुपारी पुन्हा घरी परतायच्या वेळी पुन्हा पावसाची रिपरिप सुरू झाल्याने गणेशभक्तांच्या उत्साहावर विरजण पडले.

मागील काही दिवस राज्यात वाढलेल्या उष्म्याने जनता हैराण झाली होती. मात्र, मागील दोन दिवसांपासून पडणाऱ्या पावसाने वातावरणात गारवा निर्माण केला आहे.

बळीराजा सुखावला!

राज्यात मागील महिन्यात अपेक्षेप्रमाणे पाऊस पडला नव्हता. त्यामुळे शेतकरी हवालदिल झाले होते. वरुण राजाच्या प्रतीक्षेत शेतकऱ्यांच्या नजरा आभाळाकडे लागल्या होत्या.

या आठवड्यात योग्य प्रमाणात पाऊस पडला नाही तर पिकांवर संकट ओढविण्याची शक्यता कृषी तज्ज्ञांनी वर्तविली होती. हा पाऊस शेतीसाठी, खासकरून भात शेतीस पोषक असल्याने शेतकऱ्यांसाठी चतुर्थी सण सुखवार्ता देणारा ठरणार आहे.

आज गाठणार 120 इंचांचा पल्ला

शनिवारी पाऊस १२० इंचांचा आकडा पार करणार आहे. मागील २४ तासांत सर्वाधिक ९२.८ मि.मी. म्हणजेच ३.६५ इंच पाऊस पणजीत पडला. त्या खालोखाल जुने गोवे - ५६.२ मि.मी., मुरगाव ४०.५ मि.मी, म्हापसा ३१ मि.मी., साखळी १५.६ मि.मी. पेडणे १२.८ मि.मी. तर काणकोण येथे ८.४ मि.मी. पावसाची नोंद करण्यात आली आहे. राज्यात सरासरीच्या तुलनेत ३.७ टक्के अधिक पाऊस पडला आहे.