दक्षिण गोव्यासह उत्तर गोव्यात येत्या २४ तासांत मुसळधार पाऊस पडण्याची शक्यता गोवा हवामान विभागाने वर्तविली आहे.

गोव्यात गेल्या काही दिवसांपासून पावसाने जोरदार हजेरी लावल्याने अनेक ठिकाणी जनजीवन विस्कळीत झाले होते. तसेच गोव्यातील अनेक भागांत पावसाचे पाणी साचल्याने नागरिकांची चांगलीच धांदल ऊडाली होती.

गेल्या पाच ते सहा दिवस राज्यातील अनेक भागात मुसळधार पाऊस पडला तर काही ठिकाणी अतिवृष्टी झाली आहे. त्यामुळे राज्यातील धरणांच्या पाणीपातळीत  मोठ्या प्रमाणात वाढ झाली आहे.

या भागांना सतर्कतेचा इशारा

बार्देश, तिसवाडी, मुरगाव,सासष्टी, केपे या किनारी तालुक्यांना प्रथम मुसळधार पावसाचा फटका बसण्याची शक्यता हवामान विभागाने वर्तविली आहे. तसेच येत्या २४ तासांत गोव्यातील किनारी भागांतील जिल्ह्यांत जोरदार पाऊस पडण्याची शक्यता वर्तविली आहे.

पावसामुळे राज्यात अनेक ठिकाणी रस्त्यांवर दरड कोसळण्याच्या घटना घडल्या आहेत. तसेच अनेक ठिकाणी भुस्खलनामूळे घरे पडली आहेत.  

कोठे किती पावसाची नोंद

उत्तर गोव्यात आतापर्यंत एकूण म्हणजेच ९०.५० इंच तर दक्षिण गोव्यात ८५.४३ इंच पावसाची नोंद करण्यात आली आहे. उत्तर गोव्यात सरासरीच्या तुलनेत ५०.१ टक्के तर दक्षिण गोव्यात ४७ टक्के अधिक पावसाची नोंद झाली आहे.

नागरिकांना गरज असल्यास बाहेर पडण्याचे आवाहन गोवा हवामान विभागाने केले आहे. जून महिन्यात सरासरी पावसाच्या तुलनेतही पाऊस कमी होता; परंतु जुलैच्या सुरवातीपासून पावसाने जोर धरला आहे. तो अद्याप कायम आहे.