MLA Deviya Rane: सत्तरी तालुक्यातील शेतकरी सध्या जंगली जनावरांच्या उपद्रवाने पुरते हैराण झाले असून लाल तोंडाच्या माकडांकडून नारळ,केळी, काजू व अन्य उत्पन्नांची नासधूस‌ नासधूस सुरु आहे.

या जनावरांना प्रतिबंध घालण्यासाठी कृषी खात्याच्या योजनांची माहिती सर्वसामान्य शेतकऱ्यांपर्यंत पोहोचवणे गरजेचे असून याच संदर्भात पर्येच्या आमदार डॉ.देविया राणेंनी शनिवारी विधानसभेत शेतकऱ्यांच्या व्यथा मांडल्या.

वन्यप्राण्यांकडून पिकांचे नुकसान झाल्याची बातमी आज गोमंतकने प्रसारित केली होती. याचाच पाठपुरावा करत देविया राणे यांनी हा विषय विधानसभेत मांडला.

सध्या सत्तरी तालुक्यात विविध गावांत गवे, रानडुक्कर, खेती, माकड यांचा मुक्त संचार दिसून येतो आहे. नगरगाव पंचायत भागातील गावांतील लोकांना याचा मोठा त्रास होताना दिसत आहे. गवे बागायतीत, रस्त्यावर फिरताना दिसून येतात.

त्यामुळे लोकांना बागायतीत जाणे धोक्याचे बनले आहे. या कठीण परिस्थितीमुळे बागायतदारांचे शेतीतील अर्थकारण, व्यवस्थापन बिघडले असून यावर काय उपाय करावा, या विवंचनेत ते आहेत.

तांबड्या तोंडाच्या खेत्या माकडांनी कोवळ्या नारळांचे प्रचंड नुकसान केले आहे. या खेत्या माकडांचा प्रताप महाभयंकर आहे.

ती बागायतीत घुसताना 30-40 च्या संख्येने घुसत असून त्यांना अटकाव करणे कठीण झाले असल्याचे येथील शेतकऱ्यांचे म्हणणे आहे. शेतकऱ्यांच्या या व्यथा पर्येच्या आमदार डॉ.देविया राणेंनी शनिवारी विधानसभेत मांडल्या.