Goa Mining : राज्य सरकारच्या खाण आणि भूगर्भशास्त्र खात्याच्या वतीने आज करण्यात आलेल्या ‘मोंत द शिरगाव’ या खाणीला ई-लिलावात सरकारला मोठी बोली मिळाली. या खाणीसाठी मे.राजाराम बांदेकर कंपनीने तब्बल 111.28 टक्के महसुलाची हमी देत ही खाण आपल्याच ताब्यात ठेवली, अशी माहिती खाण खात्याने दिली आहे.

एमएसटीसीच्या (मेटल स्क्रॅप ट्रेड कार्पोरेशन) ई-कॉमर्सच्या साहाय्याने राज्यातील चार ब्लॉक्ससाठी ई-लिलाव सुरू आहे. यातील ब्लॉक क्र. 1 ही डिचोली खाण वेदांताने तर ब्लॉक क्र. 2 शिरगाव- मये खाण साळगावकर शिपिंग कंपनीने मिळवली आहे. आज लिलावासाठी पाच बोलीधारक पात्र ठरले होते. बांदेकर कंपनीची बोली 100 टक्क्यांवरची असली तरी ही किंमत इंडियन ब्युरो ऑफ मायनिंगने प्रत्येक महिन्याला जाहीर केलेल्या सरासरी विक्री किमतीवर ही बोली असते. ही किंमत बाजारातील खनिज मूल्यापेक्षा नेहमीच कमी असते. त्यामुळे खनिज कंपन्यांना हा व्यवहार परवडतो.

9.59 मिलियन टन खनिज अपेक्षित

शिरगावच्या हद्दीत येणारा हा मोंत द शिरगाव खनिज ब्लॉक-3 आहे. हा 95.67 हेक्टरमध्ये विस्तारलेला असून त्यापैकी 29.80 हेक्टर खनिज भूभाग आहे. यात 65.87 हेक्टर खनिज सोडून अन्य भूभाग येतो. या ठिकाणाहून 57.39 टक्के दर्जाचे 9.59 मिलियन टन खनिज अपेक्षित आहे. शेवटच्या काले खाणीचा आता मंगळवारी ई-लिलाव होणार आहे. सोमवारी या खाणी संदर्भातले पात्र बोलीधारक जाहीर केले जातील.