Goa Mining: गाव उध्वस्त होत असेल, तर आम्हाला खाण व्यावसाय नकोच. या भूमिकेशी ठाम असलेले मुळगाववासीय गावच्या अस्तित्वासाठी पुन्हा एकदा संघटीत झाले आहेत.

आज (रविवारी) गावकरवाडा-मुळगाव येथे श्री केळबाई देवस्थानात आयोजित खाण विरोधी जाहीर सभेला नागरिकांचा उत्स्फूर्त प्रतिसाद मिळाला. सायंकाळी 4.30 वा. या सभेला सुरवात झाली.

पंचायत, देवस्थान, कोमुनिदाद आदी ग्रामसंस्थांच्या प्रतिनिधीसह हिला मिळून शंभरहून अधिक लोक सभेला उपस्थित होते.

खाण लीज क्षेत्रातून मुळगाव गावाला वगळावे. ही मुळगावमधील जनतेची प्रमुख मागणी आहे. डिचोली खाण ब्लॉक अंतर्गत मुळगावमधील 164 हेक्टर जमीन खाण लीज क्षेत्रात दाखविण्यात आली आहे.

गावकरवाडा आणि मानसबाग येथील मिळून 230 घरे, मुळगावची ग्रामदेवी श्री केळबाई देवीच्या मंदिरासह लहानमोठी मिळून 14 धार्मिक स्थळे, शाळा, पंचायतघर यासह नैसर्गिक जलस्रोत असलेले तलाव लीजक्षेत्रात येत आहेत.

आधीच खाणबंदीपूर्वी खाण व्यवसायामुळे मुळगाव गावाचे अस्तित्व संकटात आले होते. नवीन लीजप्रमाणे खाण व्यवसाय सुरु झाल्यास भविष्यात गावाचे अस्तित्वच नामशेष होण्याची नागरिकांना भीती आहे.