Biodiversity Of Mayem: मये गावातील समग्र इतिहास दर्शविणारा ‘जैवविविधता नकाशा’ तयार करण्यात आला असून या नकाशाचे येत्या बुधवारी (ता. १६) मुख्यमंत्री डॉ. प्रमोद सावंत यांच्या हस्ते अनावरण करण्यात येणार आहे.

मये-वायांगिणी पंचायतीच्या सहकार्याने मये जैवविविधता व्यवस्थापन आणि पाणलोट संघातर्फे हा नकाशा तयार करण्यात आला आहे. अशाप्रकारचा नकाशा तयार करणारे मये हे देशातील पहिले गाव ठरले आहे.

तज्ज्ञ वैज्ञानिकांच्या सहकार्याने हा प्रकल्प तयार करण्यात आला आहे, अशी माहिती मये जैवविविधता व्यवस्थापन समिती आणि पाणलोट संघाचे अध्यक्ष सखाराम पेडणेकर यांनी पत्रकार परिषदेत दिली.

शनिवारी (ता. १२) सायंकाळी डिचोलीत घेतलेल्या या पत्रकार परिषदेवेळी मये-वायंगिणीच्या सरपंच सौ. सुवर्णा चोडणकर, उपसरपंच सुफला चोपडेकर, पंच सदस्य वर्षा गडेकर, विद्याधर कारबोटकर तसेच गोशाळेचे अध्यक्ष कमलाकांत तारी उपस्थित होते.

तेराव्या शतकापासूनचा इतिहास

इसवी सन तेराशेपासूनचा मये गावचा सामाजिक, सांस्कृतिक, धार्मिक आदी वारसा याबद्दल माहिती संकलित करून ती या नकाशात समाविष्ट करण्यात आली आहे. या नकाशात जैवविविधता संपत्तीचाही अंतर्भाव करण्यात आला आहे.

गेल्या तीन वर्षांपासून या प्रकल्पाबाबतीत संशोधनाचे काम सुरू होते अशी माहिती सखाराम पेडणेकर यांनी देऊन हा प्रकल्प आताच्या आणि भावी पिढीसाठी उपयुक्त आणि वरदान ठरणार आहे, अशी आशा व्यक्त केली.

महामाया देवस्थानात नकाशाचे अनावरण

बुधवारी सकाळी 10 वाजता गावकरवाडा-मये येथील श्री महामाया देवस्थान सभागृहात आयोजित करण्यात आलेल्या सोहळ्यात प्रमुख पाहुणे मुख्यमंत्री डॉ. प्रमोद सावंत यांच्या हस्ते या नकाशाचे आणि वेबसाईटचे अनावरण करण्यात येणार आहे.

या सोहळ्यास मयेचे आमदार प्रेमेंद्र शेट खास निमंत्रित म्हणून उपस्थित राहणार आहेत. अन्य मान्यवरांत गोवा राज्य जैवविविधता व्यवस्थापन मंडळाचे सदस्य सचिव प्रदीप सरमोकादम, जिल्हा पंचायत सदस्य शंकर चोडणकर, देवस्थानचे अध्यक्ष रमेश परब, सरपंच सुवर्णा चोडणकर उपस्थित राहणार आहेत.