नाशिक : गेल्या वर्षी नाशिक नाफेड कार्यालयाकडून अत्यंत कमी दरात कांद्याची खरेदी करून तोच कांदा जादा दराने बाजारात विक्री करीत गोवा मार्केटिंग फेडरेशनने तब्बल ५ कोटी ५६ लाखांची फसवणूक केली आहे.

याप्रकरणी मुंबई नाका पोलीस ठाण्यात गोवा मार्केटिंग फेडरेशनविरोधात अपहाराचा गुन्हा दाखल करण्यात आला आहे. काशिनाथ नाईक असे गुन्हा दाखल केलेल्या गोवा फेडरेशनच्या व्यवस्थापकीय संचालकांचे नाव आहे.

नेमकं प्रकरण काय?

१ ऑक्टोबर ते डिसेंबर २०२४ या दरम्यान नाईक यांनी गोवा मार्केटिंग फेडरेशनच्या माध्यमातून नाशिक नाफेड कार्यालयाकडून जिल्ह्यातील फेडरेशन व वेगवेगळ्या एफपीसीकडून पुरवठा केलेला १,५८३.१७८ टन कांदा अवघ्या ३५ रुपये प्रतिकिलो दराने खरेदी केला.

गोवा मार्केटिंग फेडरेशनने हा अल्प दरात खरेदी केलेला कांदा स्वत:च्या फायद्यासाठी चढ्या दराने बाजारात विक्री करीत ५ कोटी ५६ लाख २१ हजार १६० रुपयांचा स्वत:चा फायदा केला.

प्रत्यक्षात हा कांदा गोवा मार्केटिंग फेडरेशनचे नाफेडच्या योजनेनुसार सामान्य जनतेला उपलब्ध करून देणे गरजेचे होते; परंतु तसे न करता गोवा फेडरेशनने नाफेड आणि सामान्य जनतेचीही फसवणूक करीत साडेपाच कोटींचा अपहार केला आहे.

ही बाब उघडकीस आल्याने यासंदर्भात मुंबई नाका पोलिस ठाण्यात गोवा फेडरेशनचे व्यवस्थापकीय संचालक काशिनाथ नाईक यांच्याविरोधात अपहाराचा गुन्हा दाखल करण्यात आला आहे.