Rise In Vegetable Price: महिनाभरापासून टोमॅटोचे दर कडाडले आहे., सर्वच भाजीचे दर वाढलेले आहेत. फक्त कांदा आणि बटाट्याचा दर स्थिर आहे. टोमॅटो १४० ते १६० रुपये प्रती किलो दराने विकला जात असल्याने मध्यमवर्गीयांच्या आहारातून टोमॅटो गायबच झाला आहे.

पालेभाज्याचे दर देखील कडाडल्याने मध्यमवर्गीयांना तुटपुंज्या पगारात संसाराचा गाडा चालवायचा कसा असा प्रश्‍न पडला आहे.

पन्नास रूपयांना पालेभाजीच्या दोन जुड्या विकल्या जात आहेत. जीवनावश्‍यक वस्तूंचे दर दिवसेंदिवस वाढत चालले आहेत. महागाईने सर्वसामान्य तसेच मध्यमवर्गीयांचे खिसे रिकामे होत आहेत.

येत्या काळात भाजीपाल्याचे दर आणखी वधारण्याची शक्यता नाकारता येत नाही. कारण श्रावण महिन्यात बहुतांशी गोमंतकीय केवळ शाकाहाराचे सेवन करतात, त्यामुळे पुढील महिन्यात भाजीला मागणी वाढणार असून जर पुरवठ्यात तूट जाणवल्यास दरात अधिक वाढ होण्याची शक्यता आहे. पणजी मार्केटमध्ये गावठी भाजी, भाजीची केळी, नीरफणस आदींना देखील चांगली मागणी आहे.

रानभाज्या बाजारात दाखल

पणजी मार्केटमध्ये टायखिळा, कुडूक, फांगला, कोंब, नीर फणस तसेच इतर रानभाज्या विक्रीसाठी येत असून त्यांना चांगली मागणी आहे.

ग्रामीण भागात रान भाज्या मुबलक प्रमाणात उपलब्ध आहेत. त्यामुळे भाजीचे दर वाढले तरी ग्रामीण भागात फारसा परिणाम झालेला नाही. सर्वत्र रानभाज्या मिळत आहेत.

बाजार भाव (प्रतिकिलो रु.)

टोमॅटो : १४०-१६०

कांदा : ३०

बटाटा : ४०

कारली : ८०

भेंडी : ६०

कोबी : ४०

फ्लॉवर : ४०

फलोत्पादन (प्रतिकिलो रु.)

भेंडी ५०

कोबी ३०

गाजर ३८

फ्लॉवर ३५

हिरवी मिरची ६५

कांदा २५

बटाटे २७

टोमॅटो ११२