Rohan Khaunte Statement: आगामी पर्यटन मोसम गोव्यासाठी चांगलाच राहील, अशी अपेक्षा पर्यटनमंत्री रोहन खंवटे यांनी व्यक्त केली. देशभरातील व आंतरराष्ट्रीय पर्यटकांना आकर्षित करण्यासाठी राज्य सरकार साधनसुविधांमध्ये वाढ करीत आहे. पर्यटकांसाठीच्या अनेक सेवा उपलब्ध करून देण्याचा प्रयत्न करीत आहे, असेही खंवटे यांनी सांगितले.

मडगावात एका हॉटेलचे उद्‌घाटन केल्यावर ते पत्रकारांशी बोलत होते. यंदा इतर राज्यांतील पर्यटकांबरोबरच इतर देशांतील पर्यटकही गोव्याला भेट देणार आहेत. जवळजवळ 60 क्रुझ बोटी येणार असल्याची शक्यता त्यांनी व्यक्त केली.

पर्यटनाच्या दृष्टीने पुढील सहा महिने महत्त्वाचे आहेत. सहा महिन्यांनंतर आणखी पर्यटक गोव्याकडे आकर्षित होतील. मुख्यमंत्री डॉ. प्रमोद सावंत पर्यटनाच्या दृष्टीने अनेक सुविधा उपलब्ध करून देण्याच्या प्रयत्नात आहेत, असे खंवटे म्‍हणाले.

गोव्यात पर्यटकांना जेवणखाण्याचा प्रश्र्न उद्‌भवत नाही. गोव्यामध्ये सर्व राज्यांतील, सर्व देशांतील जेवणखाण उपलब्ध असल्याने पर्यटकांना इथे यायला कोणतीही आडकाठी राहत नाही, असेही मंत्री खंवटे यांनी सांगितले.

या हॉटेल उद्‌घाटनप्रसंगी आमदार उल्हास तुयेकर, माजी उपमुख्यमंत्री बाबू आजगावकर, चंद्रकांत कवळेकर, माजी आमदार क्लाफासियो डायस, विल्फ्रेड डिसा, नगराध्यक्ष दामोदर शिरोडकर, उपनगराध्यक्ष दीपाली सावळ व इतर नगरसेवकही उपस्थित होते.