Amit Patkar: गोव्यातील 1.10 लाख बेरोजगारांच्या अहवालावरून पंतप्रधान नरेंद्र मोदी यांच्या नेतृत्वाखालील नीती आयोगाची खिल्ली उडविण्याचे धाडस भाजप सरकारचे मुख्यमंत्री डॉ. प्रमोद सावंत यांनी दाखविल्याबद्दल त्यांचे आम्ही अभिनंदन करीत आहोत, अशी टीका काँग्रेस प्रदेशाध्यक्ष अमित पाटकर यांनी केली आहे.

डॉ. प्रमोद सावंत यांनी 102 टक्के कोविड लसीकरण सिद्धांताचा शोध लावला होता. भाजपने त्यांना लवकरच बक्षीस देण्याची गरज आहे. शाखेवर घेतलेल्या शिक्षणाचे हे उत्तम उदाहरण आहे, अशी बोचरी टीकाही काँग्रेसचे अध्यक्ष अमित पाटकर यांनी केली आहे.

गोव्यातील बेरोजगारीची नीती आयोगाची आकडेवारी चुकीची असून गोव्यात केवळ 20 हजार बेरोजगार आहेत असा दावा करणाऱ्या मुख्यमंत्री डॉ. प्रमोद सावंत यांच्या विधानावर तीव्र प्रतिक्रिया व्यक्त करीत काँग्रेस अध्यक्षांनी भाजपला मुख्यमंत्र्यांच्या हुशारीबद्दल त्यांना बक्षीस देण्याची विनंती केली आहे.

रोजगार विनिमय खात्याने ठेवलेली आकडेवारी सदोष असल्याचा दावा करून गोव्याच्या मुख्यमंत्र्यांनी आपल्याच सरकारची खिल्ली उडवली आहे. मी त्यांच्या प्रामाणिकपणाचे कौतुक करतो. शाखांवर धडे घेतलेल्या व्यक्तीकडून आम्ही काय अपेक्षा करू शकता असा सवाल अमित पाटकर यांनी केला.

पाटकरांचे मुख्यमंत्र्यांना सवाल

सत्तरी येथील भाजप पदाधिकाऱ्याच्या कारखान्यातून जप्त करण्यात आलेल्या कॅटामाईन ड्रग्जचा तपास अहवाल सार्वजनिक करावा, असे मी मुख्यमंत्र्यांना आव्हान देतो. सिद्धी नाईकच्या गूढ मृत्यू प्रकरणाचा तपास का बंद करण्यात आला यावर त्यांनी उत्तर द्यावे. सोनाली फोगट मृत्यू प्रकरणातील पुरावे नष्ट करण्यासाठी कर्लीस रॅस्टोरंटचे बांधकाम घाईघाईत पाडले होते का? या प्रश्‍नांची उत्तरे डॉ. प्रमोद सावंत यांनी द्यावीत, असे अमित पाटकर यांनी म्हटले आहे.