Goa News: म्हार्दोळ बाजार परिसरात प्लास्टिकविरोधी मोहीम तीव्र करण्यात आली आहे. ग्राहक व विक्रेत्यांमध्ये जागृती करण्याबरोबरच पाच विक्रेत्यांना प्लास्टिक वापरल्याबद्दल दंडही केला होता. त्यानंतर संबंधित खात्याचे अधिकारीही बाजाराला भेट देऊन गेले.

तरीही बाजारात विक्रेत्यांकडून प्लास्टिक पिशव्यांचा वापर सर्रासपणे होताना दिसत आहे. म्हार्दोळ येथील साप्ताहिक सोमवारच्या बाजारात प्लास्टिकचा वापर मोठ्या प्रमाणात होत असल्याने वेलिंग-प्रियोळ- कुंकळ्ये पंचायतीने जनजागृती केली होती.

यावेळी सरपंच हर्षा गावडे, उपसरपंच, पंचसदस्य तसेच पंचायत सचिव सुशांत नाईक आदी उपस्थित होते. सरकारने निर्धारित केलेल्या प्रमाणातील प्लास्टिकचा वापर करण्यासंबंधीचा सल्लाही व्यापारी व विक्रेत्यांना अधिकाऱ्यांनी दिला असला तरी त्यांची पाठ फिरताच पुन्हा पातळ प्लास्टिक पिशव्या वापरासाठी बाहेर काढल्या जात आहेत.

छोट्या विक्रेत्यांवर कारवाई करण्याऐवजी प्लास्टिकच्या पिशव्या तयार करणाऱ्या कारखान्यांवर कारवाई का करत नाही, असा सवाल या केला जात आहे.