Sanjay School Porvorim: पर्वरी येथील संजय स्कूल व्होकेशनल सेंटर अद्याप सुरू न केल्‍याच्‍या निषेधार्थ दिव्यांग विद्यार्थ्यांच्या पालकांनी शनिवारी येथील आझाद मैदानावरील क्रांती स्मारकामसोर धरणे आंदोलन केले.

मुख्यमंत्री डॉ. प्रमोद सावंत यांनी या प्रकरणी हस्तक्षेप करावा, त्‍यात यश न आल्‍यास पर्पल फेस्‍तच्या ठिकाणी आंदोलन छेडू, असा इशारा पालकांनी दिला. दरम्‍यान, चार महिन्यांपूर्वी संजय स्कूलच्या दुसऱ्या मजल्यावरून पडून एका दिव्यांग विद्यार्थ्याचा मृत्यू झाला होता, तेव्हापासून हे केंद्र बंद आहे.

या आंदोलनाविषयी गोवा दिव्यांग हक्क संघटनेचे प्रमुख ॲव्हिलिनो डिसा यांनी सांगितले की, संजय स्कूलची इमारत असुरक्षित बनल्यामुळे मागील तीन-चार महिने बंद आहे.

आपण पालकांसह मागील महिन्यात व्यवस्थापकीय संचालकांना भेटलो होतो. तेव्हा त्यांनी काही गोष्टींना होकार दिला होता. परंतु विद्यार्थ्यांचे वर्ग काही सुरू झाले नाहीत.

आंदोलनात सहभागी झालेल्या पालकांनी सांगितले की, गेले चार महिने घरी असलेल्या मुलांना कुठेतरी सुविधा उपलब्ध करून द्यावी. पर्पल फेस्तवर मोठ्या प्रमाणात खर्च केला जातो, मग नवी इमारत बांधण्यासाठी का खर्च केला जात नाही? असा सवाल त्यांनी केला.

'त्यांना' वेळच नाही-

वीस दिवसांपूर्वी मी मुख्यमंत्री प्रमोद सावंत यांच्‍याकडे शिक्षणमंत्री म्हणून दहा मिनिटे भेटण्यास वेळ मागितली होती. परंतु पालकांना दहा मिनिटेही भेटण्यास त्यांना वेळ मिळाला नाही.

पाचच दिवसांपूर्वी आम्ही समाजकल्याणमंत्री सुभाष फळदेसाई यांच्‍याकडेही भेट मागितली, पण त्‍यांनाही वेळ मिळाला नाही. अशाने हा प्रश्‍‍न सुटणार तरी कसा?

- ॲव्हिलिनो डिसा, गोवा दिव्यांग हक्क संघटनेचे प्रमुख