थिवी येथे झालेल्या भीषण अपघातात एक बाईकस्वार गंभीर जखमी झाला. मिळालेल्या माहितीनुसार, थिवी मार्गावर हा अपघात झाला. या अपघातात बाईकस्वाराला गंभीर दुखापत झाली असून त्याला तातडीने उपचारासाठी रुग्णालयात दाखल करण्यात आले. त्याच्यावर सध्या उपचार सुरु आहेत. अपघाताची नोंद स्थानिक पोलिसांनी घेतली असून पुढील तपास सुरु आहे.

अंजुणे धरणाच्या पाणी पातळीत वाढ झाल्यामुळे जलसंपदा विभागाने मोठा निर्णय घेतला. धरणाच्या गेट क्रमांक 3 मधून 2 सेंटीमीटरने पाण्याचा विसर्ग सुरु करण्यात आला. पाणी पातळी नियंत्रित ठेवण्यासाठी आणि धरणाच्या सुरक्षिततेसाठी हा विसर्ग सुरु करण्यात आला. यामुळे नदीकाठच्या रहिवाशांना सतर्क राहण्याचे आवाहन जलसंपदा विभागाने केले.

निलेश मापारी यांनी धारबांदोडा जिल्हा पंचायत अपक्ष उमेदवार म्हणून अर्ज भरला. लोकांचा पाठिंबा मिळत असल्याचे मापारी यांनी सांगितले.

चिंबल येथील प्रस्तावित ‘युनिटी मॉल’ प्रकल्पाच्या बांधकाम परवान्यासंबंधीच्या गटविकास अधिकाऱ्यांनी दिलेल्या आदेशाला आव्हान देणारी याचिका मुंबई उच्च न्यायालयाच्या गोवा खंडपीठाने निकाली काढली. दरम्यान, याचिकाकर्त्यांनी याचिका मागे घेत या आदेशाला पंचायत उपसंचालकांकडे आव्हान देण्याचे मान्य केले. यापूर्वी, चिंबल ग्रामसभेने मॉलला विरोध करणारा ठराव मंजूर केल्यानंतर पंचायतीने गोवा पर्यटन विकास महामंडळ ‘जीटीडीसी’चा बांधकाम परवाना अर्ज फेटाळला होता.

मडगाव पोलिसांनी मटका जुगारावर कारवाई करताना एकाला अटक केली. प्रशांत बादी (49) असे संशयिताचे नाव असून मागाहून त्याला जामिनावर सोडले. येथील न्यू मार्केटजवळ संशयित मटका घेत होता. पोलिसांनी त्याच्याकडील मटका साहित्य व 740 रुपये जप्त केले. साहाय्यक पोलिस उपनिरीक्षक उमेश गावडे पुढील तपास करीत आहे.

गोव्याचे माजी उपमुख्यमंत्री बाबू आजगावकर यांनी भाजप (BJP) पक्षाच्या तोरसे जिल्हा पंचायत निवडणुकीतील उमेदवाराच्या निवडीवर उघडपणे नाराजी व्यक्त केली. या नाराजीमुळे आजगावकर यांनी भाजपच्या अधिकृत उमेदवाराविरुद्ध बंडाचे निशाण फडकवत अपक्ष उमेदवाराला पाठिंबा जाहीर केला.