स्नेहा हसोटीकर

सध्या म्हापसानजीकच्या शिरसई गावामध्ये मटेरियल रिकव्हरी फॅसिलिटी (MRF) शेडचे बांधकाम सुरु करण्यात आले असून ग्रामस्थांनी निषेध रॅली काढत बांधकाम थांबवण्याचा प्रयत्न केला. कोनेशी धबधबा आणि लगतच्या जैव विविधतेचे रक्षण करणे आमची जबाबदारी असून पर्यावरण नष्ट करून आम्हाला विकास नको असा एल्गार यावेळी उपस्थित लोकांनी केला.

कोनेशी धबधबा (ज्याला शिरसई धबधबा म्हणूनही ओळखले जाते) गावाच्या दृष्टीने खूप महत्वाचा असून येथील लगतच्या पंचक्रोशीसाठी हा एका महत्वाचा जलस्रोत आहे. या नैसर्गिक संसाधनाचे पर्यावरणीय महत्त्व ओळखून सध्या सुरु असलेले अतिक्रमण रोखण्यासाठी ग्रामस्थांनी आज निषेध रॅली काढली.

कोनेशी धबधब्याच्या स्त्रोताच्या बफर झोनमध्ये सुरु असलेले एमआरएफ शेडच्या प्रस्तावित बांधकामामुळे लगतच्या धबधब्याचे कायमचे नुकसान होणार.

त्याचबरोबर या प्रोजेक्टमुळे जवळपासच्या विहिरींचे सुद्धा प्रदूषण होणार असून याचा दूरगामी परिणाम गावाच्या भवितव्यावर होणार असल्याची भीती यावेळी नागरिकांनी बोलून दाखवली.

प्रोजेक्टमुळे गावावर गंभीर परिणाम ओढवणार असून ग्राम जैवविविधता समितीने अस्नोडा ग्रामपंचायतीद्वारे सुरु असलेले एमआरएफ शेडचे बांधकाम थांबवण्याची मागणी त्यांनी यावेळी केली आहे.