पणजी: नॅचरल आईसक्रिमची फ्रँचायझी देतो, म्हणत गोव्यातील व्यक्तीला ४.२४ लाख रुपयांचा गंडा घातला. याप्रकरणी बिहारमधून १९ वर्षीय तरुणाला अटक करण्यात आली आहे. कोलवाळ पोलिसांनी बिहारमध्ये जाऊन ही कारवाई केली. देशभरात या पठ्याने सुमारे २२ लाख रुपयांचा विविध लोकांना गंडा घातला आहे.

अलोक जयप्रकाश कुमार (१९, रा. पाटणा, बिहार) असे अटक करण्यात आलेल्या संशयित आरोपीचे नाव आहे.  बिहार येथील न्यायालकाडून ट्रान्झीट रिमांडवर त्याला गोव्यात आणून, डिचोली न्यायालयासमोर हजर केले असता त्याला पाच दिवसांची पोलिस कोठडी सुनावण्यात आली आहे. त्याला पाठविण्यात आलेल्या एकूण रक्कमेपैकी दोन लाख रुपये पोलिसांच्या विनंतीनंतर बँकेने फ्रीज केले आहेत.

पोलिसांनी दिलेल्या माहितीनुसार, संशयिताने मे ते ०९ जून २०२५ या काळात गोव्यातील व्यक्तीला संपर्क साधून, नॅचरल आईसक्रिमची फ्रँचायझी देण्याचे आश्वासन दिले. या आश्वासनाला बळी पडून व्यक्तीने संशयिताने मागितलेली सर्व माहिती दिली. नोंदणीच्या नावाखाली संशयिताने संबधित व्यक्तीकडून चाल लाख २४ हजार ९०० रुपये घेतले. यानंतर व्यक्तीला बनावट नोंदणी कागदपत्रे पाठवली.

यानंतर फ्रँचायझी देण्यास असमर्थ ठरलेल्या संशयिताविरोधात गोमंतकीय व्यक्तीने थिवी पोलिसांत तक्रार दाखल केली होती. गोवा पोलिसांनी पथक तयार करुन बिहारमध्ये संशयिताचा शोध घेऊन, संशयित अलोक कुमारला अटक केली.