पणजी : राज्यात सार्वजनिक वाहतूक प्रणालीला चालना देण्यासाठी ‘माझी बस योजना २०२५’ लागू करण्यात आली आहे. नियमांची पूर्तता करणारे सर्व खासगी बस मालक त्‍याचा लाभ घेऊ शकतील, अशी माहिती कदंबचे अध्‍यक्ष उल्‍हास तुयेकर यांनी दिली.

नव्‍या योजनेनुसार प्रत्येक किलोमीटरसाठी ३ रुपये अनुदान बस ऑपरेटरला दिले जाणार आहे. तसेच विमा अनुदान म्हणून वार्षिक विमा हप्त्याच्या ५० टक्‍क्‍यांपर्यंत (कमाल ३०,०००) अनुदान दिले जाईल. बस पुनर्बदल सहाय्य योजनामार्फत १५ वर्षांपेक्षा जुन्या बस बदलण्यासाठी १० लाख रुपयांपर्यंत साहाय्य करण्‍यात येईल.

ही योजना गोवा परिवहन संचालनालय आणि कदंबा परिवहन महामंडळ यांच्यामार्फत अंमलात आणली जाणार आहे. योजनेचा लाभ घेणाऱ्यांना बसेस ‘कदंब’च्याच रंगात रंगवाव्‍या लागतील.

ही योजना गोवा परिवहन संचालनालय आणि कदंबा परिवहन महामंडळ यांच्या मार्फत अंमलात आणली जाणार आहे. योजनेचा उद्देश खासगी स्टेज कॅरेज बस ऑपरेटर्सना आर्थिक व पायाभूत सहाय्य देणे असून, प्रवाशांना अधिक सुरक्षित, परवडणारी आणि विश्वासार्ह सार्वजनिक वाहतूक सेवा उपलब्ध करून देणे, हा असल्याचे अधिसूचनेत नमूद केले आहे.

योजनेसंदर्भात आज अधिसूचना जारी करण्यात आली आहे. यामध्ये दिलेल्या माहितीनुसार अर्जदाराचे वैध स्टेज कॅरेज परवाने गोव्यातील सक्षम प्राधिकरणाकडून मिळालेले असावेत, बस नोंदणीपासून १५ वर्षांपेक्षा जुनी नसावी.

‘केटीसीएल’ पास आणि कार्ड वापर

योजनेतील सर्व बसमध्ये ‘केटीसीएलचे स्मार्ट ट्रान्झिट पास आणि कार्ड वैध राहतील. या माध्यमातून गोळा झालेली रक्कम केटीसीएलमार्फत ऑपरेटरला परत दिली जाईल. तसेच बसवर लावलेल्या जाहिरातींमधून मिळणाऱ्या महसुलांपैकी ५० टक्के रक्कम बस ऑपरेटरला, तर उर्वरित ५० टक्के ‘केटीसीएल’कडे प्रशासकीय खर्चासाठी राहील.

अटींची पूर्तता करणाऱ्या सर्व खासगी बसेसना सवलत संधी

या योजनेंतर्गत प्रत्येक किलोमीटरसाठी ३ रुपये अनुदान बस ऑपरेटरला दिले जाणार आहेत. तसेच विमा अनुदान म्हणून वार्षिक विमा हप्त्याच्या ५० टक्के पर्यंत (कमाल ३०,०००) अनुदान दिले जाईल.

बस पुनर्बदल सहाय्य योजनामार्फत १५ वर्षांपेक्षा जुन्या बस बदलण्यासाठी १० लाख रुपयांपर्यंत सहाय्य योजनेंतर्गत केले जाणार आहे.

नवीन बसमध्ये किमान २७ प्रवासी क्षमतेची आसने असावीत, अशी एकमेव अट यामध्ये समाविष्ट आहे.

सर्वांत महत्वाचे म्हणजे प्रवाशांकडून गोळा केलेले पूर्ण भाडे ऑपरेटरकडेच राहील; कदंबा महामंडळाकडे कोणतेही भाडे जमा करावे लागणार नाही.