Goa Made Liquor Smuggling: कर्नाटकात आजही भ्रष्ट भाजप सरकारच राज्य करत असल्याचा भास गोव्याचे मुख्यमंत्री डॉ.प्रमोद सावंत यांना होत असावा. कर्नाटकातील जनतेने भ्रष्टाचार संपवण्यासाठी काँग्रेसचे सरकार निवडून दिले आहे.

कर्नाटकचे मुख्यमंत्री सिद्धरामय्या यांनी गोव्यातून कर्नाटकात होणारी दारूची तस्करी थांबवावी असे आदेश आपल्या अधिकाऱ्याना दिले आहेत. डॉ. प्रमोद सावंत याची दखल घेवून दारू माफीयांवर कारवाई करतील का? असा सवाल विरोधी पक्षनेते युरी आलेमाव यांनी केला आहे.

कर्नाटकचे मुख्यमंत्री सिद्धरामय्या यांनी गोव्यातून अवैध दारूची तस्करी रोखण्यासाठी उत्पादन शुल्क विभागाच्या अधिकाऱ्यांना दिलेल्या निर्देशांवर प्रतिक्रिया व्यक्त करताना युरी आलेमाव यांनी मुख्यमंत्री डॉ. प्रमोद सावंत यांच्या नेतृत्वाखालील गोव्यातील भाजप सरकारने गोव्याचे मानवी तस्करी, ड्रग्ज, प्रदूषणकारी आणि घातक पदार्थांची वाहतूक आणि दारूची तस्करी करणारे "ट्रांसीट हब" बनविल्याचा गंभीर आरोप केला.

आज राज्याच्या सीमांवर सरकारचे नियंत्रण राहीलेले नाही. काळ्या काचेच्या वाहनांमध्ये मृतदेह सीमेपलीकडे नेले जातात आणि अधिकाऱ्यांना त्याचा थांगपत्ता नसतो. यावरून सरकार आणि गुन्हेगार यांच्यात संगनमत असल्याचे स्पष्ट दिसून येते, असे युरी आलेमाव यांनी सांगितले.

कर्नाटकात भाजपचे सरकार असताना गोव्यातून अवैध दारूच्या वाहतुकीकडे भाजप सरकारने जाणीवपूर्वक डोळेझाक केली हे स्पष्ट आहे. मुख्यमंत्री डॉ. प्रमोद सावंत यांनी कर्नाटकातील भाजप सरकारचा आशिर्वाद असलेल्या दारू माफियांना मदत करण्यासाठी गोव्याच्या आर्थिक नुकसानाकडे दुर्लक्ष केले, असा दावा युरी आलेमाव यांनी केला.

गोव्यातून होणारी अवैध दारूची तस्करी रोखण्यासाठी सक्रिय पाऊल उचलल्याबद्दल मी कर्नाटकचे मुख्यमंत्री सिद्धरामय्या यांचे आभार मानतो. त्यांचा हा निर्णय एक प्रकारे गोव्याला महसुल प्राप्तीसाठी फायद्याचा ठरेल, असे युरी आलेमाव म्हणाले.

उत्पादन शुल्क विभागातील विविध घोटाळे कॅगने निदर्शनास आणूनही भाजप सरकारने अजूनही धडा घेतलेला नाही हे दुर्दैवी आहे. उत्पादन शुल्क विभागाचे कामकाज सुरळीत करण्यात सरकार अपयशी ठरले आहे, असे युरी आलेमाव यांनी म्हटले आहे.