पणजी: गोव्याच्या मनोहर आंतरराष्ट्रीय विमानतळावरून लंडनसाठी थेट सुरू असलेली विमानसेवा लवकरच पुन्हा सुरू होणार आहे. गेल्या महिन्यात अहमदाबाद येथे झालेल्या विमान अपघातानंतर ही सेवा तात्पुरती थांबवण्यात आली होती, मात्र आता ती यंदाच्या हिवाळी हंगामात पुन्हा सुरू होईल, अशी माहिती केंद्रीय हवाई वाहतूक मंत्रालयाने राज्यसभेत दिली आहे. गोव्याचे राज्यसभा खासदार सदानंद शेट तानावडे यांच्या प्रश्नाला उत्तर देताना केंद्रीय राज्यमंत्री मुरलीधर मोहोळ यांनी ही माहिती दिली.

काही दिवसांपूर्वीच यासंदर्भात राज्याचे पर्यटनमंत्री रोहन खंवटे यांनी देखील विधानसभेत महत्त्वाचे विधान केले होते. २९ जुलै रोजी आपल्या विभागाच्या अनुदान मागण्यांवरील चर्चेदरम्यान बोलताना खंवटे म्हणाले होते की, "गोव्याला विविध ठिकाणांहून चांगले हवाई संपर्क मिळणे हे राज्याच्या पर्यटन क्षेत्रासाठी एक मोठा बदल ठरत आहे."

अपघातामुळे सेवा थांबली होती

१२ जून रोजी अहमदाबादमध्ये लंडनला जाणाऱ्या एअर इंडियाच्या विमानाला अपघात झाला होता. या अपघातामुळे गोव्याच्या मनोहर आंतरराष्ट्रीय विमानतळावरून (मोपा) लंडनच्या गॅटविक विमानतळापर्यंतची (Goa to London-Gatwick) उड्डाणे तात्पुरती थांबवण्यात आली होती. या घटनेनंतर पर्यटक आणि गोमंतकीयांमध्ये चिंतेचे वातावरण निर्माण झाले होते. मात्र, आता ही सेवा लवकरच सुरू होणार असल्याच्या माहितीमुळे सर्वांना दिलासा मिळाला आहे.

ऑक्टोबरपासून हिवाळी वेळापत्रक

सामान्यतः, आंतरराष्ट्रीय हवाई सेवांचे हिवाळी वेळापत्रक ऑक्टोबर महिन्यापासून सुरू होते. त्यामुळे सप्टेंबर महिन्याच्या अखेरपर्यंत ही सेवा पुन्हा सुरू होण्याची शक्यता आहे, असे पर्यटनमंत्री खंवटे यांनी विधानसभेत स्पष्ट केले. गोव्यासारख्या पर्यटनप्रधान राज्यासाठी थेट आंतरराष्ट्रीय विमानसेवा अत्यंत महत्त्वाची आहे. युरोपातील अनेक पर्यटक थेट गोव्यात येण्यास प्राधान्य देतात. थेट विमानसेवा पुन्हा सुरू झाल्यामुळे आंतरराष्ट्रीय पर्यटकांना मोठा फायदा होणार असून, गोव्याच्या पर्यटन क्षेत्राला पुन्हा एकदा मोठी चालना मिळेल.

ही विमानसेवा सुरू झाल्यामुळे गोमंतकीय नागरिक, विद्यार्थी आणि व्यावसायिकांना देखील मोठा फायदा होणार आहे. त्यामुळे ही सेवा पुन्हा सुरू होण्याची आतुरतेने वाट पाहिली जात आहे. केंद्र आणि राज्य सरकारकडून या सेवेच्या पुनरुज्जीवनासाठी केले जात असलेले प्रयत्न निश्चितच स्वागतार्ह आहेत.