पणजी: गोव्याच्या विकासाचा प्रवास अखंड सुरू असून, आगामी काळात 'विकसित गोवा २०२७' हे ध्येय गाठण्यासाठी सर्वांनी मतभेद विसरून एकत्र यावे, असे आवाहन मुख्यमंत्री प्रमोद सावंत यांनी केले आहे. गोवा क्रांती दिनाच्या निमित्ताने बुधवार (दि.१८) रोजी ते जनतेला संबोधित करत होते. गोव्याच्या मुक्तीसाठी झालेल्या संघर्षावर आधारित एक ॲनिमेशन चित्रपट १९ डिसेंबर रोजी प्रदर्शित केला जाईल, अशी घोषणाही त्यांनी केली.

६० वर्षांचा विकासाचा आलेख आणि भविष्यातील संकल्प

मुख्यमंत्री सावंत यांनी नमूद केले की, गेल्या ६० वर्षांपासून गोव्यात प्रशासन अव्याहतपणे कार्यरत आहे. भाऊसाहेब बांदोडकर यांच्या काळापासून आजपर्यंत गोव्यात विविध प्रकारचा विकास साधला गेलाय.

या विकासाच्या प्रवासात समाजातील सर्व घटकांचे योगदान महत्त्वाचे आहे. सावंत पुढे म्हणाले, "आपण जाती, धर्म आणि राजकीय मतभेद विसरून 'विकसित गोवा २०२७' हे उद्दिष्ट साध्य करण्यासाठी एकत्रितपणे काम केले पाहिजे." त्यांच्या मते, राज्याचा खरा विकास तेव्हाच होईल, जेव्हा समाज एकजुटीने एकाच ध्येयाने प्रेरित होऊन कार्य करेल.

स्वच्छ आणि हरित गोव्यासाठी नागरिकांचे कर्तव्य

मुख्यमंत्री सावंत यांनी कायद्यांचे पालन करण्याच्या नागरिकांच्या जबाबदारीवरही भर दिला. ते म्हणाले, "सरकार अनेक कायदे बनवतं, पण त्यांचे पालन करण्याची जबाबदारी जनतेची आहे."

गोव्याच्या मुक्तीसाठी एकेकाळी क्रांतीची मशाल पेटली होती, त्याचप्रमाणे आज आपल्याला गोवा स्वच्छ आणि हरित ठेवण्यासाठी तीच मशाल पेटवण्याची गरज आहे, असे त्यांनी सांगितले.

स्वच्छ आणि सुंदर गोवा अधिक पर्यटकांना आकर्षित करेल, असे ते म्हणाले. "एक स्वच्छ आणि सुंदर गोवा निर्माण करणे हे प्रत्येक नागरिकाचे कर्तव्य आहे," असे सांगत त्यांनी गोवावासीयांना या मोहिमेत सक्रिय सहभाग घेण्याचे आवाहन केले.